277 дзён не спыняюцца акцыі пратэсту ў Беларусі. Грамадзяне краіны патрабуюць адстаўкі Лукашэнкі, пакараць вінаватых у фальсіфікацыях і гвалце. Рэжым не жадае дыялогу і працягвае рэпрэсіі супраць людзей. «Белсат» падводзіць вынікі дня.
Беларусы за адзін дзень перавялі на аднаўленне касцёлу ў Будславе больш за 40 тысячаў рублёў. Падчас пажару, які ўспыхнуў напярэдадні, цалкам згарэў дах святыні, піша TUT.by.
У выніку пажару ў Будслаўскім касцёле над цэнтральным нефам цалкам знішчаны дах. Але прыхажанам і працаўнікам МНС удалося выратаваць іконы, кнігі і іншыя каштоўныя рэчы. Агонь не закрануў арган і алтар.
Каталіцкія біскупы заклікалі вернікаў дапамагчы ў аднаўленні касцёла. Аналагічныя заклікі ў сацсетках распаўсюдзілі і вернікі. У выніку сёння на 14.10, на дабрачынны рахунак каталіцкага таварыства «Карытас» Менска-Магілёўскай архідыяцэзіі беларусы перавялі крыху больш за 40 787 рублёў, распавяла Вольга Лабуць, намеснік дырэктара дабрачыннага каталіцкага таварыства «Карытас» Менска-Магілёўскай архідыяцэзіі.
Арцыбіскуп Тадэвуш Кандрусевіч лічыць, што адбылася «вельмі вялікая трагедыя» як для беларускага касцёла, так і для краіны, таму што касцёл у Будславе – гісторыка-культурніцкая каштоўнасць, а Будслаўскі фэст унесены UNESCO ў Рэпрэзентатыўны спіс нематэрыяльнай культурнай спадчыны чалавецтва.
Жанчыны ў белай вопратцы сёння прагуляліся каля Камароўскага рынку.
Менавіта на гэтым месцы 9 месяцаў таму пачаліся мірныя жаночыя пратэсты супраць гвалту, які адбыўся пасля прэзідэнцкіх выбараў. Тады жанчыны выйшлі ў белым адзенні і сталі ў ланцуг каля Камароўскага рынку і на плошчы Перамогі з кветкамі ў руках.
У Магілёўскім абласным судзе 12 траўня распачаўся разгляд крымінальнай справы супраць Паўла Севярынца і яшчэ шасцярых палітычных вязняў: Ірыны Шчаснай, Максіма Вінярскага, Змітра Казлова, Яўгена Афнагеля, Андрэя Войніча і Паўла Юхневіча – актывістаў «Еўрапейскай Беларусі».
Усіх іх вінавацяць паводле некалькіх частак артыкулу 293 Крымінальнага кодэкса («Масавыя беспарадкі»).
Каля будынку суда затрымалі журналіста Аляксандра Буракова, які супрацоўнічае з «Deutsche Welle». Таксама паведамляюць пра затрыманне журналіста Уладзіміра Лапцэвіча і каардынатара Беларускай хрысціянскай дэмакратыі Алега Аксёнава. Да суда іх пакінулі ў ІЧУ.
Ссуд над палітвязнямі адбываецца ў закрытым рэжыме, нават сваякам не дазволілі прысутнічаць на працэсе. Гэта патлумачылі тым, што матэрыялы справы нібыта адносяцца да таямніцы, якую ахоўвае закон.
Адвакаты палітвязняў звязаныя падпіскаю пра неразгалошванне і не могуць распавесці пра сутнасць абвінавачання ды пазіцыю сваіх падабаронных.
Віктар Мацкевіч, адвакат Сяргея Ціханоўскага, паведаміў, што крымінальная справа супраць ягонага падабароннага, а таксама Ігара Лосіка, Мікалая Статкевіча ды іншых падазраваных у справе будуць разглядаць у Гомельскім абласным судзе, перадае Tut.by.
У судзе паведамілі, што, «згодна з пастановай намесніка старшыні Вярхоўнага Суда Беларусі 4 траўня 2021 года, крымінальная справа супраць Сяргея Ціханоўскага, Мікалая Статкевіча ды іншых накіраваная ў Гомельскі абласны суд для разгляду па першай інстанцыі».
Дату першага пасяджэння прызначыць Гомельскі абласны суд.
Абласны эканамічны суд Горадні прыняў рашэнне аб ліквідацыі «Цэнтр гарадскога жыцця». Суддзя Юлія Баклажэц задаволіла позву пракурора Уладзіміра Клішына аб ліквідацыі культурна-асветніцкай установы «Цэнтр гарадскога жыцця».
«Беларускае заканадаўства вельмі дакладна вызначае тэрмін нацызм, і ні Пушкін, ні Мажэйка блізка не стаялі каля гэтых тэрмінаў. Быў загад знішчыць незалежную непадкантрольную пляцоўку, што і было выканана. Таксама прычына – бчб-фон на карціне Пушкіна», – кажа Павел Мажэйка, стваральнік пляцоўкі.
Журналістку Кацярыну Барысевіч перавялі з Жодзінскага СІЗА ў Магілёў, паведамляе партал Tut.by. Гэта зрабілі за тыдзень да таго, як канчаецца ейны тэрмін утрымання пад вартаю, 19 траўня.
Верагодна, Кацярына выйдзе на волю з калоніі ў Гомлі, куды накіроўваюць упершыню асуджаных жанчын. Пакуль жа яна часова застаецца ў СІЗА Магілёва.
Баранавіцкая газета «Intex-press» не выйшла ў друкаванай версіі ўпершыню за 26-гадовую гісторыю існавання. А ўсё праз тое, што выдавецтва «Беларускі дом друку» паведаміла пра скасаванне дамовы на друк штотыднёвіку.
У непрацоўны і выходны дзень 9 траўня рэдакцыя атрымала электронны ліст ад Беларускага дому друку, у якім апавясціла, што «ў аднабаковым парадку» скасоўвае дамову на аказанне сваіх паслуг.
Прычыны адмовы кіраўніцтва друкарні не пазначыла. У канцы афіцыйнага ліста было напісана: «Просім прабачэння і спадзяёмся на паразуменне».
Галоўны рэдактар газеты Уладзімір Янукевіч звярнуўся да чытачоў і выказаўся наконт забароны друкавання газеты, адзначыўшы, што гэта было зроблена «па-садысцку дасканала»:
«Што да прычынаў такога ціску на нас, то няма тут нічога, што трэба было б разжоўваць або ў чымсьці капацца. Усё настолькі цынічна, пахабна і адначасова зразумела: гэта сістэмнае рашэнне пра зачыстку непадкантрольнага СМІ, якое рызыкуе адстойваць права людзей на свабоду меркаванняў, свабоду іх выказвання і распаўсюду».
Цяпер газета будуць выдаваць у электронным варыянце, пакуль не знойдзецца новая друкарня. Выпускі газеты можна будзе спампаваць на сайце intex-press.by.
У Берасці за ўдзел у «масавых беспарадках» судзяць 13 асобаў, 11 з якіх праваабаронцы прызналі палітзняволенымі. Двое з фігурантаў справы не маюць яшчэ 18 гадоў.
Затрыманых абвінавачваюць паводле ч. 2 арт. 293 КК («Масавыя беспарадкі»). 20-гадовы Данііл Бандарук яшчэ абвінавачваецца ў хуліганстве: паводле пракуратуры, 9 жніўня летась ён ударыў рукой па грузавым аўтамабілі МАЗ і разбіў бакавое люстэрка.
Пракурор запатрабаваў абвінавачаным да пяці гадоў калоніі агульнага рэжыму.
Віцяблянка Ангеліна Туравец атрымала 20 содняў адміністратыўнага арышту за маску на парадзе ў гонар Дня Перамогі.
Дзяўчыну затрымалі ранкам 9 траўня, яна адседзела 72 гадзіны ў ІЧУ да суда.
Паседжанне адбылося ў судзе Чыгуначнага раёну Віцебску, на якім суддзя Алена Цыганкова палічыла, што Ангеліна правяла адзіночны пікет, і прызначыла 20 содняў адміністратыўнага арышту. Разам з дзяўчынаю затрымалі і хлопца, але яго адпусці, бо той не меў маскі.
З рашэннем суда дзяўчына не згадзілася і збіраецца яго абскарджваць.
65-гадовы пенсіянер Адам Шпакоўскі правядзе за кратамі амаль месяц. На мужчыну склалі яшчэ адзін пратакол паводле арт. 19.10 КаАП («Прапаганда ці публічная дэманстрацыя, выраб, распаўсюд нацысцкай сімволікі ці атрыбутыкі») і прысудзілі яму яшчэ 12 содняў арышту. Раней пенсіянера асудзілі на 15 дзён арышту.
Адама Шпакоўскага затрымалі 21 красавіка. Міліцыянты заявілі, што 65-гадовы пенсіянер адмініструе раённы чат Уручча. Падставаю для ператрусаў і затрымання стала нібыта тое, што на пенсіянера паскардзіліся суседзі, бо «ён дастаў усіх сваёй беларускай мовай». У МУС заявілі, што ў кватэры мужчыны нібыта знайшлі 65 тысяч еўраў і 87 тысяч долараў. Сілавікі распачалі правяранне ў справе датычнасці менчука да фінансавання пратэстаў, бо пенсія Адама Шпакоўскага не перавышае 280 рублёў.
СК belsat.eu