Паслявыбарчыя пратэсты ў Беларусі працягваюцца 259 дзён. Грамадзяне краіны патрабуюць адстаўкі Лукашэнкі, пакарання вінаватых у фальсіфікацыях, гвалце і прававым бязмежжы. «Белсат» падводзіць вынікі гэтага дня.
Адна з лідараў пратэстнага руху ў і паплечніца кандыдаткі ў прэзідэнты Беларусі Святланы Ціханоўскай, сябра Каардынацыйнай рады Марыя Калеснікава перадала з-за кратаў свой зварот:
«У мяне сёння дзень нараджэння. Гэты дзень я заўсёды праводзіла ў коле сям’і, блізкіх і сяброў. У якой бы краіне я не знаходзілася. І заўсёды гучна і весела!
Сёння, на жаль, я вас не ўбачу, не абдыму і мы не пасмяемся так заўзята і аглушальна гучна, як толькі мы ўмеем. Але ведайце сёння і заўсёды, вы ўсё ў маім сэрцы і я ўсёй душой з вамі. Смейцеся, абдымайцеся і весяліцеся сёння. І за мяне таксама!»
7 верасня Марыю Калеснікаву затрымалі ў Менску. У ноч на 8 верасня пры спробе гвалтоўнага вывазу з Беларусі ва Украіну яна на мяжы парвала свой пашпарт і такім чынам засталася на беларускай тэрыторыі. На наступны дзень была змешчана ў СІЗА-1 у Менску як падазраваная ў крымінальнай справе аб публічных закліках да захопу дзяржаўнай улады.
Марыя знаходзіцца за кратамі 230 дзён.
Мужу Кацярыны Андрэевай Ігару Ільяшу не дазволілі спаткацца з жонкай, спаслаўшыся на дзіўнае абмежаванне.
«Подельникам в один день нельзя», – сказала супрацоўніца Жодзінскай турмы, якая прымала заяву Ігара на спатканне.
«Праблема ў тым, што маці Дашы Чульцовай учора раней за мяне сёння падала заяву. А спатканне са сваякамі фігурантам адной крымінальнай справы нельга мець у адзін дзень», – распавёў Ігар.
Цяпер маці Дашы чакае сустрэчы з дачкой у чарзе.
«Раней я не чуў пра такія абмежаванні. Выглядае на тое, што гэта нейкае ноў-хаў жодзінскай турмы. Адмова ў спатканні падаецца мне абсалютна неабгрунтаванай, а аргументацыя – бессэнсоўнай», – адзначыў Ільяш.
Аляксандр Лукашэнка заявіў, што змоўшчыкі распрацоўвалі некалькі сцэнароў «дзяржперавароту» ў Беларусі. Першапачаткова яны нібыта планавалі ліквідацыю Лукашэнкі на парадзе 9 траўня. Але паколькі рэалізацыя такога сцэнару была складанай, яны адмовіліся ад гэтага і вырашылі ўчыніць напад на картэж. З гэтай мэтай яны набылі і прывезлі ў Беларусь гранатамёты. Але і гэты сцэнар стаў немагчымым, паколькі аўтамабілі ў картэжы рухаюцца даволі хутка і патрапіць у іх з гранатамёта вельмі складана. Таму абралі трэці варыянт – напад на загарадную рэзідэнцыю Лукашэнкі. І на гэтыя мэты нават вылучылі 10 мільёнаў долараў, а на снайпера – 1 мільён долараў. Праўда, Лукашэнка не сказаў, хто вылучыў грошы і каму яны паступілі.
Акрамя гэтай гісторыі, Лукашэнка заявіў, што мае намер падпісаць падпісаць дэкрэт аб пераходзе Савету бяспекі прэзідэнцкіх паўнамоцтваў у выпадку, калі ў краіне паўстане такая неабходнасць.
Пра гэты дакумент Лукашэнка казаў яшчэ тыдзень таму на суботніку. Так дэкрэт мае стаць адным з найважнейшых рашэнняў за гады яго прэзідэнцтва. Цяпер ён заявіў, што рыхтуе план «Б» на выпадак удалага замаху на яго:
«Прэзідэнта застрэлілі – на заўтра Савет бяспекі будзе надзелены паўнамоцтвамі. Трэба ўводзіць надзвычайнае становішча імгненна, аж да ваеннага, калі хтосьці на мяжы паварухнецца. І Савет бяспекі павінен прымаць рашэнне. Таму я казаў, што падпішу гэты дэкрэт і вызначу, хто будзе кіраваць краінай «калі раптам што».
Лукашэнка падкрэсліў, што «гатовы на ўсё, але толькі каб захаваць маю і вашу краіну».
Аналітыкі адзначаюць, што насамрэч дакумент супярэчыць Канстытуцыі краіны, а па-другое, сыходзяцца ў меркаванні, што такім чынам адбываецца легалізацыя вайсковай хунты ў Беларусі.
Лукашэнка заявіў, што «гатовы на ўсё, але толькі каб захаваць маю і вашую краіну». Менавіта таму ён анансаваў, што падпіша дэкрэт аб пераходзе Савету бяспекі прэзідэнцкіх паўнамоцтваў у выпадку, калі ў краіне паўстане такая неабходнасць.
Суддзя суда Маскоўскага раёну Менску Вольга Малашэнка 23 красавіка вынесла прысуд па крымінальнай справе лідара грамадскай ініцыятывы «Альтэрнатыва» Алега Корбана, паведамляе «Вясна». Яго абвінавачвалі ў арганізацыі і падрыхтоўцы дзеянняў, што груба парушаюць грамадскі парадак, альбо актыўны ўдзел у іх (арт. 342 КК).
Алега Корбана затрымалі пасля ператрусу ў кватэры 25 кастрычніка і пакаралі 15-содняў арышту за ўдзел у несанкцыянаваным масавым мерапрыемстве, а пасля яго заканчэння перавялі ў СІЗА-1.
Вечарам 23 красавіка Алег Корбан напісаў на сваёй старонцы ў фэйсбуку:
«Цуд адбыўся, сёння мяне выпусцілі на свабоду! Суд вынес 1,5 года абмежавання волі. Падрабязнасці будуць пазней, зараз пачынаю адаптавацца да вашай свабоды».
СК belsat.eu