Фанаты адразу двух беларускіх футбольных клубаў паведамілі пра намер байкатаваць матчы свае камандаў.
Гэтак, афіцыйны акаўнт фанатаў берасцейскага «Дынама» паведаміў, што адмаўляецца вяртацца на трыбуны ў новым сезоне.
«Дарагія сябры! Як бы цяжка ні давалася нам гэта рашэнне, напярэдадні маючага адбыцца сезону вымушаныя аб’явіць, што вярнуцца на сектар у дзейных умовах мы не можам. Лічым, што гэта будзе блюзнерствам у дачыненні да рэпрэсаваных за апошнія паўгода паводле прыцягнутых за вушы нагодаў хлопцаў з нашага і іншых фанацкіх рухаў краіны. Нашы думкі – з загінулымі і пацярпелымі за сваю пазіцыю сябрамі грамадзянскай супольнасці і іх семʼямі. Спадзяемся на разуменне з боку каманды і заклікаем памятаць: мы не адвярнуліся ад «Дынама», і заўсёды дзесьці побач», – гаворыцца ў заяве фан-сектара.
Тэлеграм-канал Belultras.by таксама паведаміў пра тое, што фан-сектар гарадзенскага «Нёмна» будзе байкатаваць матчы праз палітычную сітуацыю ў краіне.
«Перад стартам чарговага футбольнага сезону хочам усім яшчэ раз нагадаць. Актыўны фан-сектар удома і на выездзе будзе адсутнічаць да поўнай перамогі народа! Усім дабра і цярпення! Жыве Беларусь!» – заявілі фанаты «Нёмна».
Галоўны трэнер «Нёмна» Ігар Кавалевіч, старшыня клуба Іван Варсовіч, трэнер брамнікаў Сяргей Шляхоўскі, начальнік каманды Дзмітрый Барысейка, галоўны трэнер дубля Дзмітрый Траско, трэнер дубля Віталь Тарашчык, экс-футбаліст, а цяпер працаўнік клуба Андрэй Горбач падпісалі праўладны ліст беларускіх спартоўцаў.
МГ belsat.eu
