«Пагаворвалі, што тут СІЗА можа будзе». Сведчанні пра лагер для арыштаваных пад Слуцкам

Вёска Паўлаўка пад Слуцкам вядомаю на ўсю Беларусь стала нядаўна. Менавіта сюды, паводле шматлікіх сведчанняў, прывозілі ўдзельнікаў першых паслявыбарчых пратэстаў. Адзін з затрыманых, Павел Патапаў, так распавядаў у эфіры «Белсату» пра гэтае месца.

«Павярнулі в лес, доўга ехалі па лесе, у галаву прыходзілі розныя думкі… Напачатку гэта падалося нейкай прамзонай. Куча людзей з аўтаматамі. Нас прывезлі праз нейкія вялізныя вароты, як звычайна паставілі тварам да сцяны… Мы пад падушкамі, пад матрацамі знаходзілі часопісы, хутчэй за ўсё гэта было падрыхтавана даўно і там ужо хтосьці знаходзіўся».

Жыхары вёскі Паўлаўка згадваюць, што за савецкім часам у гэтым месцы была вайсковая частка:

«Салдаты стаялі кадравыя спачатку, можа ракетчыкі, а ўжо потым зрабілі вольнае пасяленне».

«Гэта вольнае пасяленне было, гадоў дзесяць напэўна былі тут гэтыя хлопцы. Потым перайменавалі ў ЛТП, мужчынскі. Там і царква была, мы хадзілі на адкрыццё, яна здаецца і цяпер дзее. Потым ужо жанчыны сталі жыць, таксама алкаголікі».

Падчас паслявыбарчых падзеяў жыхароў лячэбна-працоўнага прафілакторыю этапавалі ў іншыя ўстановы, а на тэрыторыі арганізавалі імправізаваны лагер для арыштаваных удзельнікаў пратэстаў. Паводле сведчанняў мясцовых жыхароў – ненадоўга:

«Пагаворвалі адразу, што тут СІЗА можа будзе, бо там насамрэч пабудова такая, каб з гораду вынесці».

«Уначы прывезлі, ніхто нават не бачыў. Я ранкам у лес ішла ў лес, дык бачыла што многа машын было. А ўжо ўвечары нікога не было – пуста і глуха стала».

«Потым іх вывезлі, ну распусцілі і яны раз’ехаліся пад дамах і ўсё».

Паводле мясцовых жыхароў, цяпер на гэтай тэрыторыі зноў функцыянуе Слуцкі лячэбна-працоўны прафілакторый.

 

Ірына Дарафейчук, «Белсат»