Самалёт кіраўніка ПВК Вагнэра зноў заўважаны ў Беларусі. Сёння раніцай ён прызямліўся ў Мачулішчах. Аб гэтым паведамляе маніторная група «Беларускі Гаюн».
1 ліпеня ў 08:53 адзін з бізнес-джэтаў кіраўніка ПВК Вагнэра Яўгенія Прыгожына «Embraer Legacy 600» (рэгістрацыйны нумар RA-02795) прызямліўся на ваенным аэрадроме ў Мачулішчах. Хто быў на яго борце – пакуль не вядома.
Як паведамляў раней «Белсат», абодва бізнес-джэты Прыгожына пакінулі Беларусь уначы 27 чэрвеня, а сам кіраўнік ПВК Вагнэра перад тым, імаверна, меў сустрэчу з Лукашэнкам. Той раз барты кіраўніка наймітаў прабылі ў Мачулішчах крыху больш за 14 гадзінаў.
30 чэрвеня спадарожнікавае назіранне заўважыла заканчэнне будоўлі пад Асіповічамі палявога лагеру на 8 000 чалавек, імаверна прызначанага для размяшчэння вагнэраўцаў у Беларусі.
Планы размяшчэння ў Беларусі часткі вагнэраўцаў былі агучаныя пасля завяршэння хуткаплыннага мяцяжу ПВК Вагнэра, як адбыўся 23-24 чэрвеня. Тады баевікі спыніліся ў 200 км ад Масквы, ажыццявіўшы перад тым захоп штабу ў Растове-на-Доне і здзейсніўшы марш на расейскую сталіцу. Мяцеж скончыўся пасля перамоваў Прыгожына з Аляксандрам Лукашэнкам.
Пазней адзін з наймітаў ПВК Вагнэра Аляксей Брэст Бярговін расказаў у відэазвароце аб тым, што адкрываецца новы баявы кірунак – Беларусь.
Антон Тачняк belsat.eu
