У Генеральную пракуратуру Нямеччыны падалі скаргу на беларускіх сілавікоў за злачынствы супраць чалавечнасці.
Еўрапейскі цэнтр канстытуцыйных правоў і правоў чалавека (ECCHR) разам з Сусветнай арганізацыяй супраць катаванняў (OMCT) падалі скаргу генеральнаму пракурору Нямеччыны супраць шасці высокапастаўленых прадстаўнікоў органаў бяспекі Беларусі за злачынствы супраць чалавечнасці, паведамілі ў OMCT.
У скарзе ўтрымліваецца інфармацыя пра злачынствы з боку органаў бяспекі пасля 9 жніўня 2020 года, у тым ліку пра масавыя затрыманні, катаванні, знікненні людзей, сексуальны гвалт і палітычны пераслед.
Такія злачынствы могуць разглядацца ў Нямеччыне паводле прынцыпу ўніверсальнай юрысдыкцыі.
«Мы чакаем распачынання федэральным пракурорам папярэдняй справы ў дачыненні да вінаватых, бо ў самой Беларусі нябачна расследаванняў гэтых парушэнняў міжнароднага права. Пацярпелыя павінны мець магчымасць рэалізоўваць свае правы, і Нямеччына мае ўзяць у гэтым вядучую ролю. Забеспячэнне доказаў павінна таксама ўмацаваць еўрапейскі падыход да крымінальнага пераследу, а таксама захады ў рамках ААН», – тлумачыць Андрэас Шулер, дырэктар праграмы міжнародных злачынстваў і адказнасці ECCHR.
У сваю чаргу Джэралд Стабэрак, генеральны сакратар OMCT, заявіў пра «відавочныя доказы таго, што катаванні выкарыстоўваліся наўмысна і што яны былі шырока распаўсюджанымі і сістэматычнымі, што дасягнула парога злачынстваў супраць чалавечнасці».
«Гэта пацвердзілі розныя міжнародныя расследаванні, у тым ліку Маскоўскі механізм АБСЕ. Наша ўласная справаздача прадэманстравала, што Беларусь не прыняла ніякіх захадаў для пакарання за гэтыя злачынствы, вінаватыя ў якіх застаюцца на 100% беспакаранымі», – сказаў ён.
МГ belsat.eu