Рэжым Лукашэнкі працягвае пераследаваць беларусаў за грамадзянскую пазіцыю, затрымліваць і выносіць палітычныя прысуды. «Белсат» распавядае пра рэпрэсіі, пра якія стала вядома 3 траўня.
3 траўня ў Менскім абласным судзе прагучалі прысуды ў справе супраць чальцоў рэдакцыі тэлеграм-каналу «Nexta» Рамана Пратасевіча, Яна Рудзіка і Сцяпана Пуцілы. Іх абвінавацілі ў змове з мэтаю захапіць дзяржаўную ўладу неканстытуцыйным шляхам. Чальцы рэдакцыі прызнаныя вінаватымі ў «публічных закліках да захопу дзяржаўнай улады, актаў тэрарызму, абразе прэзідэнта, распаўсюдзе заведама ілжывых звестак пра Беларусь ды іншых злачынствах». Пратасевіч атрымаў 8 гадоў, Рудзік і Пуціла – адпаведна 19 і 20.
Пазоў у «справе «Nexta» разгледзяць у парадку грамадзянскай судовай вытворчасці. Раней Генеральная пракуратура паведамляла, што ў дачыненні абвінавачаных заяўлены пазоў аб пакрыцці маёмаснай шкоды на агульную суму больш за 30 мільёнаў рублёў.
У Менску 3 траўня пачаўся суд над праграмістам і адміністратарам тэлеграм-чату «Па-беларуску» Андрэем Філіпчыкам. Яго вінавацяць у актыўным удзеле ў групавых дзеяннях, што груба парушаюць грамадскі парадак паводле «народнага» артыкулу (ч. 1 арт. 342 КК). Справу прызначылі разглядаць суддзю Лідзію Цяліцу. Тэлеграм-канал «Па-беларуску» публікуе жарты і мэмы на беларускай мове. Пасля затрымання сілавікі пісалі, што на канале прасоўваліся «лацінка і нянавісць да расейскамоўнай сацыякультурнай прасторы».
У Горадні затрымалі музыку Аляксандра Гайваронскага, вакаліста кавэр-бэнду «Fair Play». На «пакаянным» відэа мужчына кажа, што выступаў у адзенні «забароненых колераў»: у відэа паказалі фота, дзе Аляксандр – у майцы з гербам Пагоня. Таксама музыка быў падпісаны на «экстрэмісцкія» каналы.
У судзе Пінску няпоўнагадовага хлопца асудзілі за абразу Лукашэнкі на два гады «хатняй хіміі». 17-гадовага Кірыла Граноўскага абвінавацілі паводле ч. 1 арт. 368 КК. Вядома толькі тое, што ў хлопца сканфіскавалі тэлефон «як сродак здзяйснення злачынства».
У Магілёве затрымалі маці 3-гадовага дзіцяці, якой пагражаюць крымінальным пераследам. Падставаю для затрымання сталася тое, што жанчына, застаючыся ў дэкрэце, была падпісаная на «экстрэмісцкія» чаты і каналы, дзе перыядычна пакідала каментары. Аднак на «пакаянным» відэа жанчына кажа, што не разумее, за што яе затрымалі, бо нічога супрацьзаконнага яна не рабіла.
Алена Рувіна belsat.eu