Прэс-служба МЗС Беларусі паведаміла пра выклік у міністэрства 3 лістапада Часовага паверанага ў справах Польшчы ў Беларусі Марціна Вайцехоўскага, якому быў выказаны «рашучы пратэст» у сувязі «з чарговым фактам парушэння 2 лістапада дзяржаўнай мяжы Беларусі паветраным суднам з боку Польшчы».
«Падчас сустрэчы польскаму дыпламату заяўлены рашучы пратэст у сувязі з чарговым фактам парушэння 2 лістапада 2023 года дзяржаўнай мяжы Рэспублікі Беларусь паветраным суднам з боку Рэспублікі Польшча», – гаворыцца ў паведамленні прэс-службы МЗС Беларусі.
У МЗС запатрабавалі ад польскага боку «ўважлівага расследавання гэтага інцыдэнту і прыняцця дзейсных захадаў для выключэння такіх выпадкаў у будучыні». А таксама «рашуча ўказалі на прынцыповую недапушчальнасць нядбайнага стаўлення да выканання палётаў у памежнай зоне».
Ні дзяржаўны Памежны камітэт Беларусі, ні Міністэрства абароны не паведамлялі пра інцыдэнт з польскім самалётам, які нібыта парушыў беларускую мяжу. Польскае замежнае ведамства таксама не публікуе ніякай інфармацыі на гэты конт. «Белсат» адсочвае сітуацыю.
Зміцер Міраш belsat.eu
