Міністр абароны Украіны Аляксей Рэзнікаў заявіў, што на беларускіх вайсковых базах цяпер 12 тыс. расейскіх вайскоўцаў, паведамляе «Reuters». Аднак, паводле яго, гэтай колькасці недастаткова, каб пачаць новы наступ з боку Беларусі.
Аляксей Рэзнікаў мяркуе, што Расея паспрабуе пачаць новы наступ з «сімвалічных прычынаў» на гадавіну ўварвання – 24 лютага, але расейскае войска з ваеннага пункту гледжання цяпер не гатовае да гэтага. Ён мяркуе, што наступленне, хутчэй за ўсё, пачнецца на ўсходзе – дзе Расея спрабуе захапіць увесь Данбас, – або на поўдні, дзе яна хоча пашырыць свой сухапутны калідор да акупаванага Крыму.
Паводле міністра абароны Украіны, самая вялікая мара Крамля – захапіць Кіеў, для расейцаў гэта сімвалічна, і яны вераць, што тады Украіна падзе. Але ў нападзе з боку Беларусі Рэзнікаў сумняецца.
«На сёння на тэрыторыі Беларусі мы не бачым сфармаваных ударных груповак, здольных ісці на Кіеў», – сказаў Рэзнікаў.
У Мінабароны адзначылі, што хоць цяпер на палігонах у Беларусі прысутнічаюць 12 тыс. расейскіх вайскоўцаў, яны не ўяўляюць пагрозы для Украіны. Раней Аляксей Рэзнікаў заявіў, што Украіна цалкам гатовая да новага расейскага наступу – у Збройных сілаў дастаткова тэхнікі для адбіцця нападаў акупантаў.
Нагадаем, паводле інфармацыі Галоўнага ўпраўлення разведкі Мінабароны Украіны ад 25 студзеня, у Беларусі было 5800 расейскіх вайскоўцаў.
Алена Рувіна belsat.eu
