Праваабаронцы прызналі палітвязнямі яшчэ 21 асобу, цяпер у пераліку – амаль 1400 прозвішчаў. Затрыманы супрацоўнік ліквідаванага дабрачыннага фонду «Вяртанне» Сяргей Макарэвіч. ГУБАЗіК у чарговы раз зладзіў кватэрны пагром. «Белсат» сабраў хроніку рэпрэсіяў за дзень.
Праваабарончы цэнтр «Вясна» паведаміў, што палітвязнямі прызнаная яшчэ 21 асоба. Іх пазбавілі волі за абразу Аляксандра Лукашэнкі, прадстаўнікоў улады (міліцыянтаў ды суддзяў), за знявагу дзяржаўных сімвалаў. Цяпер у спісе палітвязняў 1 тысяча 394 прозвішчы.
Стала вядома пра затрыманне супрацоўніка дабрачыннага фонду «Вяртанне» Сяргея Макарэвіча. Раніцай у яго правялі ператрус, а потым адвезлі ў ізалятар у Горадні. Паводле якога артыкула затрымалі Макарэвіча, невядома.
Фонд «Вяртанне» садзейнічаў развіццю беларускай культуры, навукі і адукацыі. Напрыканцы кастрычніка арганізацыю ліквідаваў Менскі гарадскі суд па позве галоўнага ўпраўлення юстыцыі Менскага гарвыканкаму.
Супрацоўнікі ГУБАЗіКу разграмілі кватэру прэс-сакратаркі палка Каліноўскага. Яны раскідалі рэчы, зламалі шафы і канапы, разбілі люстэркі і нават закаткі, што стаялі ў кладоўцы. Раней ГУБАЗіК публікаваў відэа з пагромамі ў кватэрах рэдактаркі «Карателей Беларуси» і YouTube-канала «Дзікае паляванне» Яніны Сазановіч, грамадскага дзеяча Вадзіма Пракоп’ева, блогера Андрэя Павука, прадстаўніцы кіберпартызанаў Юльяны Шаметавец.
Затрыманага проста на вуліцы ў Менску краязнаўцу і журналіста Ігара Хмару пачнуць судзіць 10 лістапада, даведаліся праваабаронцы «Вясны». Справу разгледзіць суддзя Маскоўскага раённага суда Таццяна Пірожнікава. Хмару вінавацяць паводле «народнага» артыкула: «Актыўны ўдзел у дзеяннях, што груба парушаюць грамадскі парадак». Затрымалі яго падчас экскурсіі за тое, што размаўляў на вуліцы па-беларуску.
Палітвязня Андрэя Новікава вызвалілі з калоніі і адразу дэпартавалі ў Расею. Там яго перадалі ФСБ, паведамляе «Вясна». Новікаў – расейскі грамадзянін. Падчас перадвыбарчай кампаніі 2020 года быў валанцёрам ініцыятыўнай групы Святланы Ціханоўскай. Тады яго затрымалі па «справе Ціханоўскага» па абвінавачванні ў «арганізацыі дзеянняў, што груба парушаюць грамадскі парадак». Але, пратрымаўшы за кратамі 7 месяцаў, нечакана адпусцілі, адвезлі ў Расею і забаранілі заезд у Беларусь на 10 гадоў. Тут у яго засталася жонка і двое дзяцей, таму ён цішком вярнуўся. Яго зноў затрымалі і ў жніўні 2020-га далі 2 гады калоніі. Тэрмін скончыўся 5 дзён таму.
На волю выйшаў палітвязень з Ваўкавыску Алег Фамін. Ён прадпрымальнік і футбольны трэнер. Вызваліўся сёння а 6-й раніцы, адбыўшы ўвесь тэрмін. Фаміна вінавацілі ў гвалце ў дачыненні да міліцыянта і асудзілі на 2,5 гады.
Сяргей Крот belsat.eu