«Белсат» падводзіць вынікі апошніх содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 7 кастрычніка чытайце ў нашым аглядзе.
Чарговыя содні вайны ва Украіне адзначыліся адносным зацішшам у плане правядзення наземных аперацыяў. Амерыканскі Інстытут вывучэння вайны (ISW) мяркуе, што ЗСУ працягнулі наступаць на паўночным усходзе Харкаўскай вобласці, але гэтыя атакі не мелі такога маштабнага характару, які назіраўся ў папярэднія дні. Прарасейскі тэлеграм канал «Иди и смотри» піша, што хутчэй за ўсё гэта звязана з падрыхтоўкай да вялізнага наступу – з поўначы і поўдня – на Сватава. Таксама крыніца адзначае, што ўкраінскія сілы, якія знаходзяцца ў вызваленай Макееўцы Луганскай вобласці, імаверна, паспрабуюць перакрыць трасу паміж Сватава і Крэмінной.
У Данецкай вобласці зноў атакавалі расейскія войскі, традыцыйна адзначыўшыся найбольшай актыўнасцю ў ваколіцах Бахмуту. Генеральны штаб ЗСУ піша пра адбіццё атакаў на населеныя пункты Выімка, Краснае, Бахмут, Маёрск, Вясёлае, Пабеда, Невельскае, Камянка. Разам з тым аналітыкі ISW адзначаюцца частковы поспех войскаў РФ у ваколіцах Бахмуту, а расейскія крыніцы паведамляюць пра захоп населеных пунктаў Адрадаўка і Вясёлая Даліна. Прарасейскі тэлеграм-канал «Рыбарь» адзначае таксама невялікія поспехі расейцаў у ваколіцах гораду Мар’інка Данецкай агламерацыі.
Між тым, нягледзячы на шматлікія прагнозы з абодвух бакоў канфлікту, ЗСУ пакуль так і не пачалі наступаць у Запарожскай вобласці. Аднак павелічэнне ўкраінскай групоўкі на гэтым участку фронту па-ранейшаму адзначаецца асобнымі аналітыкамі.
Паводле ISW, у Херсонскай вобласці, пасля маштабнага адступлення, расейскім войскам усё ж такі ўдалося стабілізаваць лінію фронту і заняць абарону. Былы міністр абароны так званай ДНР Ігар Гіркін мяркуе, што расейцам у гэтым плане пашанцавала з надвор’ем, паколькі праз дажджы ЗСУ не змаглі развіць свой поспех.
Нягледзячы на запаволенне баявых дзеянняў, Генштаб ЗСУ піша, што за содні расейскія войскі страцілі каля 350 чалавек асабовага складу, такім чынам агульныя беззваротныя страты РФ з моманту пачатку поўнамаштабнай вайны ва Украіне дасягнулі 61 680 чалавек.
На гэтым тле міністр абароны Украіны Аляксей Рэзнікаў звярнуўся да расейскіх вайскоўцаў, заявіўшы, што кіраўніцтва РФ іх падманула, і цяпер кідае на смерць за ілюзорныя мэты Уладзіміра Пуціна. Міністр заклікаў расейцаў уратаваць сваю краіну ад трагедыі, а войска – ад знішчэння.
ВК belsat.eu
