«AstraZeneca» адклікае з продажу сваю вакцыну ад ковіду праз сур’ёзны пабочны эфект
Вакцыну ад каронавіруса вытворчасці кампаніі «AstraZeneca» больш не будуць выкарыстоўваць у Еўразвязе. Яна правакуе ўтварэнне тромбаў, якія могуць быць смяротна небяспечнымі, хоць вытворца гэта адмаўляе, паведамляе «The Telegraph».
Заява пра адкліканне вакцыны «Oxford-AstraZeneca Covid» з продажу падалі вытворцам 5 сакавіка, 7 траўня яна ўступіла ў моц. Такія ж заявы неўзабаве будуць пададзеныя ў Вялікай Брытаніі ды іншых краінах па-за ЕЗ.
Супраць «AstraZeneca» падала пазовы 51 сям’я. Людзі сцвярджаюць, што іхныя сваякі памерлі менавіта пасля вакцынацыі прэпаратам «AstraZeneca». Вядома пра 445 пацверджаных выпадкаў вакцынаіндыкуваных трамбозаў і як мінімум 81 смяротны выпадак пасля вакцынацыі ў Вялікай Брытаніі.
Фармацэўтычная кампанія тым часам заяўляе, што здымае вакцыну з продажу з выключна камерцыйных прычынаў, бо яе замянілі абноўленымі прэпаратамі, і адмаўляе, што вакцына выклікае трамбатычны трамбацытапенічны сіндром (TTS) – утварэнне тромбаў з адначасоваю нізкаю колькасцю трамбацытаў.
«AstraZeneca» ганарыцца тым, што за першы год ужывання вакцыны былі ўратаваныя больш за 6,5 мільёна жыццяў, а па ўсім свеце былі пастаўленыя больш за тры мільярды дозаў вакцыны.
Раней «AstraZeneca» прызнавала, што вакцына іх вытворчасці можа выклікаць трамбозы ў некаторых пацыентаў у вельмі рэдкіх выпадках.
Марыя Міхалевіч belsat.eu
