21-гадовага Мікалая Слёза пакаралі «хіміяй» за тое, што юнак намаляваў сцяг на закінутым будынку Дома культуры ў аграгарадку Кішчына Слабада Барысаўскага раёну. Хлопца прызналі вінаватым паводле арт. 341 КК («Апаганьванне збудаванняў і псаванне маёмасці»), піша «Вясна».
Суд Барысаўскага раёна прызнаў вінаватым 21-гадовага Мікалая Слёза паводле арт. 341 КК («Апаганьванне збудаванняў і псаванне маёмасці»).
Жыхара аграгарадка Кішчына Слабада абвінавацілі ў тым, што ён з сябрам намаляваў на закінутым будынку Дома культуры два бел-чырвона-белыя сцяга. Таксама, паводле абвінавачвання, хлопцы размалявалі яшчэ дрэвы ды слуп электраперадач белай і чырвонай фарбамі. Сябра Мікалая судзяць асобна.
Адметна, што будынак Дома культуры закінуты ў 2000 годзе, ёсць нават рашэнне аб зносе гэтага даўгабуду. Агульная шкода размалёўвання склала 51 рубель. Сам хлопец сваю віну прызнаў цалкам.
Пракурор запрасіў для абвінавачанага 1,5 года «хіміі». 8 снежня суддзя прызнаў Мікалая Слёза вінаватым і прысудзіў яму 1 год абмежавання волі з накіраваннем ва ўстанову адкрытага тыпу.
Праваабаронцы прызналі Мікалая Слёза палітвязнем.
АК belsat.eu
