Марыя Калеснікава ў лісце з-за кратаў свайму бацьку піша, што надалей знаходзіцца ў медсанчастцы. Палітзняволеная паведамляе, што паступова аднаўляецца пасля аперацыі. Яе ліст публікуе Telegram-канал Віктара Бабарыкі.
Марыя Калеснікава ў лісце свайму бацьку паведамляе, што да гэтага часу знаходзіцца ў медсанчастцы. Ліст яна напісала 27 снежня.
«З’явілася магчымасць хадзіць-шпацыраваць каля гадзіны ў дзень – я паволі нарошчваю тэмп і колькасць крокаў – сёння 5000, гэта сапраўдны рэкорд для мяне, бо з 29/11 да апошняга тыдня я амаль не рухалася.
У мяне яшчэ не ўсё ў парадку, але я настроена пазітыўна і аптымістычна і маю намер быць здаровай!
Таму рыхтуйся: твае дранікі і шашлыкі ў мяне нумар 1 у будучым меню.
Усім нашым родным і блізкім перадавай велізарныя прывітанні і віншаванні з усімі святамі – я ўсіх вельмі люблю і ўсім удзячная за любоў, падтрыманне і клопат!
Калі ласка, беражыце сябе, а ты, тата, асабліва! Бо нам трэба будзе так шмат усяго зрабіць, падарожнічаць і ўбачыць, і столькі адкрыццяў нас яшчэ чакае!
Вельмі цябе кахаю і моцна-моцна сумую!
Я заўсёды думаю пра вас з Таняй, гэтыя думкі мяне саграваюць і я нават часам забываю, дзе я знаходжуся! Таму я заўсёды побач!
Кахаю і моцна абдымаю! Усё будзе добра!
Твая дачка».
Крызіс са здароўем у палітзняволенай пачаўся 28 лістапада летась, калі «да праблемаў з ціскам, млосцю і стратаю прытомнасці дадаўся пакутлівы боль у страўніку». Калеснікаву завезлі ў гомельскі шпіталь хуткай дапамогі, дыягнаставалі прабадзенне язвы, зрабілі аперацыю. Пазней яе перавялі ў медсанчастку калоніі, дзе дазволілі пабачыцца з бацькам.
Незадоўга да шпіталізацыі яе змясцілі на 10 содняў у штрафны ізалятар. Там было вельмі холадна, праз што палітзняволеная амаль не спала. Некалькі разоў яна траціла прытомнасць, у яе быў павышаны ціск і млосць. Сярод іншага яна страціла прытомнасць у душы і пры падзенні падрапала ногі.
Марыю Калеснікаву схапілі 7 верасня 2020 года. У верасні 2021 года яе пакаралі 11 гадамі зняволення паводле абвінавачанняў у «змове з мэтаю захопу ўлады», «закліках да дзеянняў супраць нацыянальнай бяспекі» і «стварэнні экстрэмісцкага фармавання».
Алена Аляксандрава belsat.eu