У Расеі зацікавіліся магчымасцю палётаў з Масквы ў Горадню. Гэта вынікае з ліста, які накіравала федэральнае агенцтва паветранага транспарту (Расавіяцыя) у расейскія авіякампаніі.
У тэлеграме Расавіяцыі, змест якой перадае ТАСС, утрымліваецца просьба да расейскіх авіякампаніяў аб тым, каб яны перадалі інфармацыю, што да зацікаўленасці палётамі з гарадоў Расеі ў Горадню.
«У адпаведнасці з лістом Генконсульства РФ у Горадні просім у тэрмін да 18 красавіка прадаставіць… інфармацыю пра зацікаўленасць вашых авіякампаніяў у выкананні палётаў па маршрутах з пунктаў на тэрыторыі Расейскай Федэрацыі ў Горадню (Рэспубліка Беларусь)», – гаворыцца ў тэлеграме.
На сённяшні дзень прамыя рэйсы ў Маскву, Санкт-Пецярбург, Казань, Сочы здзяйсняюцца з Менска, Гомлі і Берасця.
Міжнароднымі перавозкамі пасажыраў Гарадзенскі аэрапорт пачаў займацца ў 2003 годзе, прапускная здольнасць аэрапорта – 300 чалавек у гадзіну. На сённяшні дзень рэгулярныя рэйсы ў аэрапорце не здзяйсняюцца, але тэхнічна ён гатовы да ўзнаўлення міжнародных палётаў.
Раман Шавель belsat.eu