За тыдзень ад гадавіны выбараў менскія суды паспелі прызначыць амаль 400 содняў арышту

На працягу гэтага тыдня ў Менску судзілі затрыманых у знакавыя для Беларусі дні – гадавіну леташніх прэзідэнцкіх выбараў і пачатку мірных акцый пратэсту. Усяго менчукам толькі за тыдзень прысудзілі штрафы на 13 920 рублёў і 397 сутак адміністрацыйнага арышту, паведамляе праваабарончы цэнтр «Вясна».

Усяго ў Менску на гэтым тыдні асудзілі мінімум 30 чалавек.

На менчукоў складалі пратаколы за ўскладанне кветак на месцы гібелі Аляксандра Тарайкоўскага, даючы штрафы і содні.

Верагодна момант затрымання Кастуся Цаўлоўскага каля станцыі метро Пушкінская ў Менску 10 жніўня.

Фота: nashaniva / Telegram

Каля кінатэатра «Аўрора» 10 жніўня затрымалі 33-гадовага Яўгена Маліноўскага за бранзалеты «няправільнай» расфарбоўкі. На наступны дзень суддзя Ярохіна пакарала Маліноўскага 30-соднявым арыштам.

Некаторых менчукоў прэвентыўна затрымлівалі перад 9 жніўня: сілавікі прыходзілі з ператрусам дадому, затрымлівалі ў кавярні ці падманам выманьвалі на вуліцу, дзе затрымлівалі.

Двух менчукоў затрымалі за белы аркуш паперы і дзіцячы малюнак на вакне.

АД, belsat.eu