У берасцейскім ГСКБ (Галоўнае спецыялізаванае канструктарскае бюро), якім кіруе брат Аркадзя Добкіна (заснавальніка «EPAM»), адбыліся ператрусы і затрыманні, піша выданне «Наша Ніва». Інфармацыі пра затрыманне самога кіраўніка кампаніі, 75-гадовага Сямёна Добкіна, пакуль няма.
Як адзначае выданне, на мінулым тыдні ў кампаніі затрымалі некалькіх асобаў. Суразмоўцы паведамілі, што чулі ад працаўнікоў пра сувязь арыштаў з карупцыяй.
Журналістам пакуль не ўдалося звязацца з заснавальнікам кампаніі.
Галоўнае спецыялізаванае канструктарскае бюро працуе ў галіне цеплаэнергетыкі і спецыялізуецца на выпуску інжынернага абсталявання для жыллёва-камунальных гаспадарак, будаўнічых арганізацыяў і іншых суб’ектаў сацыяльнага прызначэння. У лік прадукцыі прадпрыемства ўваходзяць вадагрэйныя і паравыя катлы на газавым, вадкім і цвёрдым паліве, гарэлкі блокавыя газавыя і газавыя інфрачырвонага выпраменьвання.
Апошнія гады Сямён Добкін жыве ў Нью-Ёрку, ягонага брата Аркадзя Лукашэнка абвінавачваў у фінансаванні пратэстаў.
Раман Шавель belsat.eu
