Міністр фінансаў Юрый Селіверстаў заявіў у інтэрв’ю «Беларусь 1», што ў студзені – лютым бюджэт выконваўся дастаткова стабільна, але ў сакавіку сітуацыя пагоршылася.
«Цяпер плацяжы за сакавік паступаюць больш стрымана. Ёсць праблемы з абʼёмамі паступленняў ад тых сектараў, якія апынуліся пад санкцыямі і пакуль не перастроіліся: гэта экспарт калійных угнаенняў, экспарт нафтапрадуктаў», – адзначыў ён.
Паводле міністра, у выніку «прасядання» плацяжоў «адсоткаў 10 мы не дабяром, гэта бачна на сёння».
Селіверстаў таксама паведаміў, што па выніках перамоваў з Масквою было прапанавана частку плацяжоў па расейскіх крэдытах змясціць у тэрмінах на 5-6 гадоў наперад: «Мы маем перанос тэрмінаў, які дазволіць нам цяпер не адцягваць рэсурсаў на абслугоўванне абавязкаў і пагашэнне перад партнёрамі з Расеі».
Раней, у лютым 2022 года, Масква паабяцала дапамагчы Беларусі рэфінансаваць запазычанасці перад Расеяй на суму $ 1 мільярд. То бок цяпер гаворка не пра рэфінансаванне праз новы крэдыт, а проста пра адтэрмінаванне пагашэння крэдыту.
РР belsat.eu