«Белсат» падводзіць вынікі 453-х содняў поўнамаштабнай вайны, распачатай Расеяй ва Украіне. Пра галоўныя падзеі на вечар 22 траўня чытайце ў нашым аглядзе.
За апошнія содні вайны Узброеныя сілы РФ нанеслі па тэрыторыі Украіны 6 ракетных і 52 авіяцыйныя ўдары, а таксама здзейснілі 65 абстрэлаў з рэактыўных сістэмаў залпавага агню.
У Генеральным штабе Збройных сілаў Украіны падкрэсліваюць, што для ўдараў па Лімане, Славянску і Касцянтынаўцы расейскія войскі выкарыстоўвалі комплексы С-300, якія не ёсць высокадакладнаю зброяй.
Наземныя аперацыі войскаў РФ былі засяроджаныя на купянскім, ліманскім, бахмуцкім, аўдзееўскім і мар’інскім кірунках у Харкаўскай, Луганскай і Данецкай вобласцях. Цягам содняў на вышэйзгаданых кірунках адбыліся 37 баявых сутыкненняў. Пры гэтым інтэнсіўнасць баявых дзеянняў істотна адрознівалася ў залежнасці ад канкрэтнага ўчастку фронту.
На мяжы з Беларуссю сітуацыя застаецца нязменнаю: фармавання наступальных груповак на тэрыторыі краіны не зафіксавана.
Удзень 22 траўня дыверсійна-выведная група з тэрыторыі Украіны перайшла мяжу з РФ з боку памежнага пераходу «Грайваран» (Белгародская вобласць).
Паводле прарасейскіх крыніцаў, у выніку баёў ДВГ заняла Казінку і Глотава, а таксама ўвайшла ў сяло Гара-Падол, дзе цяпер працягваюцца баі каля мясцовага дому культуры. Беспасярэдне за гэтым паселішчам месціцца раённы цэнтр, горад Грайваран.
У гэты ж час у легіёне «Свабода Расеі», які ўзяў на сябе адказнасць за вылазку, заявілі пра захоп сяла Гара-Падол і пачатак штурму райцэнтру Грайваран. Баі ў горадзе пацвярджаюць і прарасейскія крыніцы.
Паводле папярэдняй інфармацыі, пры мінанні мяжы дыверсійна-выведная група налічвала два танкі, адзін БТР і 9 бранятанкавай машынаў.
Таксама ёсць паведамленні пра заход яшчэ адной ДВГ у іншую памежную мясцовасць у Белгародскай вобласці – вёску Дронаўка.
Улады рэгіёну ўвялі план «Эдэльвейс». Аб’яўлены агульны збор работнікаў ува ўсіх аддзяленнях паліцыі.
Таксама гучаць паведамленні пра эвакуацыю цывільнага насельніцтва з памежных мясцовасцяў.
Дарадца кіраўніка Офісу прэзідэнта Украіны Міхайла Падаляк заявіў, што Кіеў не мае беспасярэдняга дачынення да падзеяў у Белгародскай вобласці.
Паводле Генштабу ЗСУ, на купянскім кірунку расейскія войскі чарговы раз правялі наступальныя дзеянні каля Масютаўкі, намагаючыся палепшыць сваё тактычнае становішча, але поспеху не мелі.
Аналітыкі праекту «Deepstate» заўважаюць, што ў ваколіцы мясцовасці прыбыло падраздзяленне наймітаў і былых вязняў «Шторм-z». Таксама адзначаюць павелічэнне выкарыстання выведнай авіяцыі.
Украінскае камандаванне паведамляе пра няўдалыя наступальныя дзеянні праціўніка каля Івана-Дар’еўкі. Адначасова з гэтым працягваюцца абстрэлы ўздоўж усёй лініі сутыкнення.
Намесніца Міністра абароны Украіны Ганна Маляр заявіла, што ЗСУ працягваюць кантраляваць пэўныя аб’екты і прыватны сектар у раёне «Самалёт» на паўднёвым захадзе Бахмуту.
У гэты ж час на поўначы і поўдні ад райцэнтру працягваюцца баі за галоўныя вышыні.
Расейскія сілы чарговы раз контратакавалі каля Іванаўскага, але былі адкінутыя сіламі абароны на старыя пазіцыі.
Паводле ўкраінскага камандавання, войскі РФ наступалі ў бок Аўдзееўскі і Первамайскага, але поспеху не дасягнулі.
«Deepstate» паведамляе, што ЗСУ ўдалося вярнуць частку раней страчаных пазіцыяў каля Краснагораўкі.
У гэты ж час крыніца фіксуе павелічэнне колькасці жывой сілы праціўніка па лініі баявога сутыкнення, а таксама абсталяванне расейцамі дадатковых фартыфікацыйных пабудоваў каля Данецку.
Як і ў папярэднія дні, расейцы штурмавалі ўкраінскія пазіцыі ў Мар’інцы, а таксама намагаліся абысці горад з флангаў. Пакуль ЗСУ ўдаецца стрымліваць праціўніка.
На поўдні ад Данецку расейцы не праводзілі наземных аперацыяў, аддаўшы перавагу нанясенню артылерыйскіх удараў.
У Запарожскай вобласці войскі РФ таксама засяродзіліся на вядзенні абароны. «Deepstate» фіксуе павелічэнне колькасці фартыфікацыйных пабудоваў каля Бярдзянску, Мэлітопалю, Камянкі і Джанкою.
Уздоўж Дняпра працягваюцца артылерыйскія дуэлі. Пра наземныя аперацыі ніводнага з бакоў канфлікту не паведамляецца.
Паводле Генштабу ЗСУ, за апошнія содні вайны сілы абароны краіны знішчылі каля 720 расейскіх вайскоўцаў, пасля чаго агульныя беззваротныя страты РФ дасягнулі 203 880 чалавек.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
ТМ belsat.eu