Са спісу экстрэмісцкіх матэрыялаў упершыню выключылі адзін пункт. Гаворка пра зборнікі твораў Вінцэнта Дунін-Марцінкевіча, паведамляюць праваабаронцы «Вясны» з Берасця.
Паўгода на сайце Міністэрства інфармацыі значылася, што творы Вінцэнта Дунін-Марцінкевіча – экстрэмісцкія матэрыялы» згодна з рашэннем Жыткавіцкага суда за 8 лістапада 2023 года. Але цяпер замест кніг напісана «адменена» і ўдакладняецца: рашэнне раённага суда адмяніў прэзідыум Гомельскага абласнога суда 11 сакавіка 2024 года.
«На гэты момант гэта першы (і адзіны) прыклад таго, калі ўлады перадумалі і адмянілі рашэнне аб прызнанні чаго-небудзь экстрэмісцкімі матэрыяламі. Больш прыкладаў адмены ў спісе няма», – адзначаюць праваабаронцы.
Паводле заявы пракуратуры Менску, экстрэмісцкімі матэрыяламі былі прызнаныя прадмова Язэпа Янушкевіча да кнігі, а таксама тэксты твораў «Плывуць вятры», «Гутарка старога дзеда», што прыпісваюцца Дунін-Марцінкевічу, і залучаныя ў заключную частку пад назваю «Dubia» серыі «Беларускі кнігазбор» Выбраныя творы / Вінцэнт Дунін-Марцінкевіч.
Вершы «Плывуць вятры» і «Гутарка старога дзеда» былі напісаныя класікам беларускай літаратуры ў часе змагання з расейскімі царскімі ўладамі.
У XIX стагоддзі ўлады Расейскай імперыі пераследавалі Дунін-Марцінкевіча за тыя ж радкі, якія сёння ўлады Беларусі назвалі экстрэмісцкімі: за «Гутарку старога дзеда». Прачытаць верш у правапісе арыгіналу можна тут.
Якуб Хруст belsat.eu
