«Шлях да будучыні не павінен быць Чарнобыльскім». Як адзначылі гадавіну аварыі на ЧАЭС
Прайшло 38 гадоў са дня аварыі на Чарнобыльскай АЭС. Звычайна 26 красавіка беларусы выходзяць на «Чарнобыльскі шлях». Цяпер у самой Беларусі гэта немагчыма, аднак людзі працягваюць успамінаць пра пацярпелых праз катастрофу, як бы далёка ні давялося з’ехаць з краіны.
Ад самай раніцы 26 красавіка Святлана Ціханоўская ўзгадала пра Чарнобыльскую катастрофу і выказалася наконт актуальнай ядравай небяспекі.
«Хоць з моманту трагедыі прайшло амаль 40 гадоў, на жаль, мы не можам сказаць, што рызыкаў яе паўтарэння не існуе. Адна з такіх пагрозаў – Астравецкая АЭС. Пры ўсёй нядбайнасці рэжыму, яна становіцца бомбай запаволенага дзеяння. Жахліва нават уявіць маштаб экалагічнай катастрофы, да якой рэжым можа прывесці краіну. Акрамя таго, дыктатар размяшчае ў Беларусі расейскую ядравую зброю і тым самым ператварае краіну ў мішэнь. Для яго гэта – інструмент, каб пагражаць суседзям і падняць уласную значнасць», – адзначыла палітык.
Па яе словах, сёння Беларусь становіцца «гуманітарным Чарнобылем».
«Тысячы людзей знаходзяцца ў турмах. Сотні тысяч выехалі. Але з іншага боку, апошнія гады шмат чаму нас навучылі. Мы навучыліся жыць, не спадзяваючыся на дзяржаву. Мы навучыліся падтрымліваць, дапамагаць адно аднаму, адстойваць свае інтарэсы і каштоўнасці. Калі дзяржава паводзіць сябе безадказна – мы навучыліся браць адказнасць за лёс сваёй краіны і змагацца за яе будучыню.
Мае дарагія! Наш шлях да будучыні не павінен быць Чарнобыльскім. Ён павінен быць бяспечным для нас і нашых дзяцей. Я ўпэўненая: мы абавязкова ўбачым нашую краіну без ядравай пагрозы. І без дыктатуры, якая да ўсяго гэтага прывяла», – працягнула Ціханоўская.
У гэты ж дзень у Вільні офіс Святланы Ціханоўскай усклаў кветкі да помніка «Маці Чарнобылю». Акрамя беларускіх актывістаў, у мерапрыемстве прынялі ўдзел пасол па асаблівых даручэннях Літвы па Беларусі, паслы Нарвегіі, Канады, Іспаніі, Ірландыі і Эстоніі, а таксама прадстаўнікі амбасадаў Польшчы, ЗША, Ізраілю і Украіны.
Яшчэ адна падзея ў Вільні, якая прысвечаная Чарнобылю, – выстава ў Віленскім беларускім музеі імя Івана Луцкевіча «Зона адчужэння». Там прадстаўленыя працы беларускіх дзяцей, пацярпелых ад катастрофы. А таксама рэпартажныя здымкі Уладзіміра Сапагова з Чарнобыльскіх шляхоў 90-х.
«Размова пра Чарнобыль цяпер – гэта не толькі практыкаванні памяці, але таксама моцная метафара таго, што адбываецца з намі цяпер – нестрыманай сілы, якая раскідвае нас як ёй заўгодна, на якую мы ніяк не можам паўплываць. Але выстава сведчыць аб тым, як беларусы выжываюць праз жудасныя рэчы, пакідаючы след нашчадкам – дзіцячыя працы, здымкі дэманстрацыяў – і гэты след кліча жыць насуперак усяму», – адзначыла куратарка выставы Паўліна Вітушчанка.
У Польшчы беларусы анансавалі акцыі ў некалькіх гарадах: Варшаве, Вроцлаве і Беластоку. Падчас «Чарнобыльскага шляху» у Варшаве не толькі ўшанавалі памяць ахвяраў трагедыі, але і выступілі супраць расейскай ядравай зброі ў Беларусі. Да мерапрыемства далучыўся намеснік Ціханоўскай у АПК і кіраўнік НАУ Павел Латушка і і прадстаўніца Абʼяднанага пераходнага кабінета Беларусі па пытаннях нацыянальнага адраджэння Аліна Коўшык.
Таксама беларускія дыяспара ў Нью-Ёрк у анансавала акцыю 26 красавіка, у Бруселі і Чыкага «Чарнобыльскі шлях-2024» пройдзе 27 красавіка. А 28 красавіка беларусы збяруцца у Лондане.
Арсен Рудэнка belsat.eu
