Журналіста Дзяніса Івашына таемна судзілі ў калоніі, не паведаміўшы нават адвакату
Палітзняволенага журналіста Дзяніса Івашына перавялі з калоніі на строгі турэмны рэжым, перад гэтым асудзіўшы на таемным судзе, пра які не ведаў нават адвакат. Пра гэта паведамляе жонка палітвязня Вольга.
Вольга Івашына распавяла, што маці журналіста Людміла напісала запыт начальніку магілёўскай калоніі № 15 Лазарэнку, калі ад сына доўгі час не было ніякіх вестак. У лісце ад 18 ліпеня за подпісам Лазарэнкі паведамляецца, што Дзяніс Івашын пераведзены на турэмны рэжым у Жодзіна.
Пасля гэтага маці напісала яшчэ адзін ліст з просьбаю патлумачыць падставу для пераводу. У адказе было пазначана, што ў калоніі правялі суд, які і вынес адпаведную пастанову.
Аднак пра судовы працэс, які пастанавіў перавесці журналіста з калоніі на строгі турэмны рэжым, не ведалі ні родныя, ні адвакат Івашына, які мусіў бы яго абараняць.
Вольга дакладна не ведае, што сталася прычынаю пераводу Дзяніса Івашына з калоніі ў турму. У каментары «Белсату» яна казала, што найхутчэй мэта – пагоршыць умовы щтрымання. Паводле ейных словаў, найбольш вядомых палітвязняў, такіх як філосаф Уладзімір Мацкевіч ці палітык Павел Севярынец, прыблизна праз 1,5 года ўтрымання ў калоніі пераводзяць на турэмны рэжым, каб пагоршыць умовы. Але Вольга зазначае, што і ў цяперашніх калоніях «выжыць без добрага здароўя цяжкавата».
«Я ведаю, што Дзяніса збівалі ў калоніі № 15, неяк неўзлюбілі яго і, можа быць, такім чынам вырашылі адпомсціць. А можа гэта быць такі цэнтралізаваны загад, каб усіх палітвязняў пераводзіць на турэмны рэжым», – мяркуе жонка палітзняволенага журналіста.
У верасні мінулага года журналіста Дзяніса Івашына прысудзілі да 13 гадоў і 1 месяца калоніі ўзмоцненага рэжыму і штрафу памерам 150 базавых велічынь. Кожнаму з дзевяці «пацярпелых» Івашын павінен выплаціць 2000 рублёў. Суд над журналістам пачаўся 15 жніўня і праходзіў у закрытым рэжыме. Вядома, што ў першы дзень перад пачаткам суда Дзяніс Івашын выкрыкнуў у калідоры «Жыве Беларусь! Слава Украіне!».
Журналісту выставілі абвінавачванне паводле арт. 365 («Умяшанне ў дзейнасць супрацоўніка органаў унутраных справаў») і ч. 1 арт. 356 Крымінальнага кодэксу («Здрада дзяржаве»). КДБ абвінаваціў Дзяніса ў супрацы з украінскаю выведкаю. Сваякі і калегі кажуць, што затрыманне звязанае з ягоным апошнім расследаваннем пра былых байцоў украінскага «Беркута», якія пасля ўцёкаў з Украіны ўладкаваліся на працу ў беларускі АМАП.
Дзяніс Івашын правёў у СІЗА гарадзенскай турмы 18 месяцаў. За гэты час ён перажыў сэрцавы прыступ, перахварэў на невядомую інфекцыю. На вязня ціснулі: яму блакавалі ліставанне з роднымі, яго неаднаразова кідалі ў карцар. У траўні 2021 года ў Івашына памерла бабуля, аднак яго не пусцілі на пахаванне.
