Міліцыянты прыходзяць дадому да менчукоў, якія калісьці былі заўважаныя ў апазіцыйнай дзейнасці. Крыніцы «Белсату» паведамілі, што былым актывістам дэмакратычнага руху, якія нават не ўдзельнічалі ў пратэстах 2020 года, прапаноўваюць падпісаць папярэджанне аб забароне парушэння грамадскага парадку.
У лісце, дзе трэба паставіць подпіс, паведамляецца таксама, што ў выпадку ўдзелу ў несанкцыянаванай акцыі, грамадзянін можа быць прыцягнуты да крымінальнай адказнасці. Некаторым яны паведамілі, што выконваюць загад ГУБАЗіКу.
На фоне таго, што ў краіне практычна няма нават відавочных прыкметаў «выбарчай кампаніі», такія «абходы» сілавікоў выглядаюць дзіўна. Не выключана, што сілавікі з візітам прыйдуць да актывістаў і ў іншых рэгіёнах краіны.
Надоечы сілавікі ўчынілі сапраўдную аблаву на сваякоў палітвязняў і тых палітзняволеных, якія ўжо вызваліліся, з увагі на харчовую дапамогу ад ініцыятывы «INeedHelpBy». Ператрусы і затрыманні пачаліся ж у той дзень, калі стала вядома, што арганізацыю прызналі «экстрэмісцкім фармаваннем». Пад рэпрэсіі трапілі найменей як 130 асобаў, паведамлялі праваабаронцы.
Любоў Лунёва belsat.eu