Затрымалі «спячую ячэйку экстрэмістаў». Хроніка рэпрэсіяў у Беларусі 31 сакавіка
У апошні дзень сакавіка ў Беларусі адбыліся некалькі палітычна матываваных судоў і па палітычных справах былі затрыманыя некалькі чалавек. Акрамя таго, Вярхоўны суд разгледзеў апеляцыйныя скаргі фігурантаў «справы Аўтуховіча». Падрабязней – у нашым штодзённым аглядзе рэпрэсіяў у Беларусі.
У Гомлі 31 сакавіка сілавікі затрымалі ў гаражным кааператыве чатырох сяброў, якіх назвалі «спячай ячэйкай экстрэмістаў»: 35-гадовага Дзмітрыя Папкова, 34-гадовага Ігара Чарнавусава, 32-гадовага Канстанціна Гвоздзева і 34-гадовага Уладзіміра Каменнага. Іх абвінавачваюць у сувязях з беларускімі добраахвотнікамі, якія ваююць ва Украіне.
У Менску за данаты пачалі судзіць ІТ-спецыяліста Руслана Завадзіча. Яму інкрымінуюць два данаты ў By_Help у жніўні 2020 года на агульную суму каля $50 і Валеру Цапкалу на суму каля $25 у 2021 годзе. Мужчыну абвінавачваюць у фінансаванні экстрэмісцкай дзейнасці.
У Кобрыне затрымалі 25-гадовую Вікторыю Вараксіну. Праўладныя тэлеграм-каналы паведамляюць, што дзеўчына нібыта была кіраўніком Telegram-чату «Кобрын для жыцця», удзельнічала ў акцыях пратэсту і распаўсюджвала «нацысцкую сімволіку».
У Менскім гарадскім судзе 31 сакавіка адбылося 9 паседжанне па справе палітвязня Іллі Шапаткоўскага. Мужчына знаходзіцца ў СІЗА ўжо больш за 2 гады і 7 месяцаў. Яго абвінавачваюць паводле ч.1 арт. 357 КК КБ(«Змова ці іншыя дзеянні, учыненыя з мэтай захопу ўлады неканстытуцыйным шляхам»). Працэс вядзе суддзя Наталля Бугук.
Вядомы глыбоцкі бодзібілдэр Аляксандр Шарабайка пераведзены ў СІЗА-2 Віцебску. Паводле папярэдняй інфармацыі, яму інкрымінуюць абразу Лукашэнкі. Аляксандра затрымалі 13 сакавіка, пазней яму прызначылі 10 содняў арышту.
У «Спіс экстрэмістаў» дадалі яшчэ 41 прозвішча – цяпер у ім 2637 чалавек. Акрамя іншых, у спіс дадалі вайсковага аналітыка Ягора Лебядка, былога палітзняволенага намесніка дырэктара Менскага роварнага таварыства Максіма Пучынскага, блогераў Кацярыну і Сяргея Чарэшку, спартоўца Дзяніса Хатылёва.
У судзе Цэнтральнага раёну Менску па справе падрыву міліцэйскай машыны на 15 гадоў пазбаўлення волі асудзілі Максіма Селязнёва. Яго прызналі вінаватым у здзяйсненні «акту тэрарызму ў мэтах аказання ўздзеяння на прыняцце рашэнняў органамі ўлады, застрашвання насельніцтва і дэстабілізацыі грамадскага парадку».Таксама па гэтай справе да трох месяцаў арышту за «неданясенне аб злачынстве» асудзілі Дзмітрыя Марцінкевіча.
Вярхоўны суд Рэспублікі Беларусь 31 сакавіка разглядзеў апеляцыйныя скаргі фігурантаў «справы Аўтуховіча». Судовая калегія прыняла рашэнне вызваліць Мікалая Аўтуховіча ад прызначанага пакарання праз заканчэнне тэрмінаў даўніны ў частцы асуджэння паводле арт. 295-3 КК РБ(«Незаконныя дзеянні ў дачыненні да прадметаў, дзеянне якіх заснавана на выкарыстанні гаручых рэчываў»), а Ірыну Гарачкіну – паводле ч. 1 арт. 405 КК («Пакрыванне цяжкага злачынства»). У выніку Гарачкінай скарацілі тэрмін на 1 месяц, а Аўтуховічу пакінулі без зменаў. Скаргі іншых фігурантаў справы пакінутыя без задавальнення.
Палітзняволенага Мікіту Емяльянава перавялі ў гарадзенскую турму. Мікіта – актывіст анархісцкага руху, асуджаны напачатку 2020 года да 7 гадоў пазбаўлення волі. Пазней Менгарсуд па апеляцыйнай скарзе зменшыў тэрмін Мікіту да 4 гадоў калоніі ўзмоцненага рэжыму. У 2022 годзе хлопца асудзілі на два гады калоніі за «злоснае непадпарадкаванне патрабаванням адміністрацыі папраўчай установы» і канчаткова прызначылі па сукупнасці прысудаў з улікам раней неадбытага пакарання тры з паловай гады калоніі ўзмоцненага рэжыму.
Марыя Міхалевіч belsat.eu
