Працоўная група «Хрысціянская візія» Каардынацыйнай рады паведаміла пра тое, што ксёндз Вячаслаў Барок, які раней правёў 10 дзён за кратамі, пакінуў Беларусь.
Як піша «Хрысціянская візія», Вячаслаў Барок быў выкліканы ў Расонскі РАУС 1 і 4 ліпеня праз новую адміністрацыйную справу – за публікацыю фота дзяцей з бел-чырвона-белымі сцягамі на польска-беларускай мяжы. У яго дома спрабавалі правесці незаконны «агляд». Праз гэта і праз пагрозы каталікам з боку Аляксандра Лукашэнкі ён быў вымушаны пакінуць Беларусь.
Барок абяцае распавесці падрабязнасці ад’езду заўтра на сваім Youtube-канале.
У мінулым снежні ксёндз Вячаслаў Барок правёў за кратамі 10 дзён, бо апублікаваную ім антыфашысцкую карыкатуру палічылі «дэманстрацыяй нацысцкай сімволікі». Адносна яго таксама праводзіў праверку полацкі аддзел Следчага камітэту.
Ксёндз з Расонаў Вячаслаў Барок вядзе ўласны YouTube-канал і не хавае сваіх поглядаў на падзеі ў Беларусі.
Раней ксёндз ужо быў вымушаны хадзіць на размову ў Следчы камітэт быццам бы ў якасці сведкі па крымінальнай справе, аднак яму задавалі пытанні пра ягоны YouTube-канал. Ён лічыць, што ціск на яго аказваецца толькі таму, што ён дае маральную ацэнку дзеянням уладаў.
АА belsat.eu
