Студэнт Беларускага дзяржаўнага педагагічнага ўніверсітэту Мацвей Гранкевіч працяглы час застаецца за кратамі. 15 верасня яго занеслі ў «спіс тэрарыстаў». «Вясна» паведаміла падрабязнасці пра хлопца.
Праваабаронцы «Вясны» паведамляюць, што Мацвею Гранкевічу 21 год, ён заканчваў навучанне на гістарычным факультэце БДПУ, за кратамі ўжо даўно. У «спіс датычных да тэрарыстычнай дзейнасці» яго 15 верасня занёс КДБ.
У сёлетнім жніўні ў Менскім гарадскім судзе Гранкевіча судзілі паводле двух артыкулаў Крымінальнага кодэксу: ч. 1 арт. 342 («Удзел у дзеяннях, што груба парушаюць грамадскі парадак») і ч. 1 арт. 130 («Распальванне іншай сацыяльнай варожасці»). Справу разглядала суддзя Наталля Бугук, але вынік праваабаронцам невядомы.
1 кастрычніка Мацвею споўніцца 22 гады. З гэтай нагоды праваабаронцы раяць падтрымаць вязня лістамі і пасылкамі. Грашовыя пераводы хлопцу забароненыя праз тое, што яго змясцілі ў «спіс тэрарыстаў».
Антон Тачняк belsat.eu