Урад Латвіі пастанавіў закрыць 19 верасня пункт пропуску «Сілэнэ» на мяжы з Беларуссю, паведамляе lsm.lv. У Рызе такое рашэнне растлумачылі меркаваннямі бяспекі.
19 верасня закрыецца памежны пераход «Сілэнэ – Урбаны» на латышска-беларускай мяжы. Такое рашэнне ўхваліў урад балтыйскай краіны, растлумачыўшы гэта меркаваннямі бяспекі.
Памежнікаў накіруюць у іншыя месцы для абароны мяжы, паведаміў міністр унутраных справаў Рыхардс Казлоўскіс.
Закрыццё пераходу звязанае з міграцыйным крызісам. Улады Латвіі сцвярджаюць, што за апошні тыдзень спынілі 894 парушальнікі, агулам у верасні – 1773, а ў жніўні было 1615 спробаў парушэння мяжы.
Выданне delfi.lv удакладняе, што ў сярэднім за содні праз Сілэнэ мяжу міналі 625 асобаў, а таксама 90 легкавікоў і грузавікоў.
Паводле звестак Дзяржаўнага памежнага камітэту Беларусі, за мінулыя содні на гэтым пераходзе на выезд у Латвію аформілі 158 легкавых машынаў і 64 грузавыя.
Дзеля таго, каб не спыніліся грузаперавозкі і неабходныя паездкі, а таксама з увагі на «гуманітарныя меркаванні і форс-мажорныя абставіны» на латышска-беларускай мяжы застанецца адкрыты пункт пропуску «Патэрніекі – Грыгараўшчына», пішуць латышскія медыі.
18 жніўня Літва на нявызначаны тэрмін закрыла памежныя пераходы «Шумскас» (з беларускага боку – «Лоша») і «Твярачус» (з беларускага боку – «Відзы»), а яшчэ раней, у лютым, – грузавы чыгуначны пункт «Стасілас – Беняконі».
Такім чынам, на мяжы Беларусі з краінамі ЕЗ засталося шэсць адкрытых пераходаў: адзін – з Польшчаю ў Берасці, чатыры – з Літвою і адзін – з Латвіяй.
Сяргей Крот belsat.eu