21 лютага прэзідэнт Расеі Уладзімір Пуцін сабраў пазачарговае паседжанне Савету бяспекі, на якім абмеркаваў прызнанне незалежнасці самаабвешчаных на тэрыторыі Украіны «ЛНР» і «ДНР». Пра гэта паведамляе РИА Новости.
У сваёй прамове Пуцін увязаў прызнанне «ЛНР» і «ДНР» з нежаданнем краін Захаду заблакаваць уступ Украіны ў НАТО.
Намеснік кіраўнік Адміністрацыі прэзідэнта РФ Дзмітрый Козак заявіў, што Украіна «не бачыць магчымасці асаблівага статусу для Данбасу». А старшыня Дзяржаўнай думы Вячаслаў Валодзін заклікаў прызнаць «рэспублікі».
«У выпадку прызнання Данбасу ціск будзе бязмежным, але Расея ведае, як гэтаму супрацьстаяць, праз некаторы час напружанне будзе спадаць», – сказаў у сваю чаргу намеснік старшыні Савету бяспекі Дзмітрый Мядзведзеў.
На яго думку, «Захад папросіць вярнуцца да дыялогу па стратэгічнай бяспецы праз нейкі час, калі Расея прызнае Данбас – як гэта было пасля 2008 пасля прызнання Абхазіі і Паўднёвай Асеціі».
«Пагроза санкцыяў – гэта балюча і непрыемна, але час прыйшоў, час прымаць рашэнні, адкладаць нельга», – адзначыла кіраўніца Савету Федэрацыі Валянціна Мацвіенка.
За прызнанне «ЛНР» і «ДНР», «калі не будзе ніякіх зрухаў», таксама выказаліся прэмʼер-міністр Міхаіл Мішусцін, дырэктар Службы вонкавай выведкі Сяргей Нарышкін і сакратар Савету бяспекі Мікалай Патрушаў. А кіраўнік МУС Уладзімір Калакольцаў увогуле заклікаў прызнаць іх незалежнасць у межах Луганскай і Данецкай вобласцяў Украіны.
«Адназначна» прызнаваць «рэспублікі» вырашыў і міністр абароны Сяргей Шайгу.
«Рашэнне па пытанні аб прызнанні «ДНР» і «ЛНР» будзе прынятае сёння», – падсумаваў абмеркаванне Пуцін.
На тле абмеркаванняў абваліўся курс расейскага рубля. Да долара ён знізіўся да 79 рублёў, да еўра – да 90. А Маскоўская біржа згубіла больш як 12%. Індэкс упершыню з 10 лістапада 2020 года стаў ніжэйшым за 3000 пунктаў.
ПС belsat.eu