Былы супрацоўнік Службы бяспекі Украіны, вайсковы эксперт Іван Ступак пракаментаваў «Белсату» тое, як мяцеж Яўгенія Прыгожына ў Расеі ўплывае на Аляксандра Лукашэнку ў Беларусі. І якія ў яго застаюцца варыянты.
«Проста ўявіце сабе, як бурыцца звыклы, знаёмы, утульны свет аднаго дыктатара Рэспублікі Беларусь, калі ўсё зразумела. Вось тут мы, тут Расея, тут 6000 боегаловак, усё добра, тут нафты шмат, і нам дапамагаюць. Але як цяпер гэты свет разбураецца», – адзначыў Іван Ступак, дадаўшы, што каля 70 % беларускай эканомікі завязаныя на Расею.
Паводле яго, Аляксандр Лукашэнка разумее, што Уладзімір Пуцін слабы: «Не тое што кульгавая качка на адну лапу, ён на дзве лапы кульгавы, і ён не можа даць рады з сітуацыяй». А людзі, якім Пуцін сам даў зброю, цяпер абарочваюць яе супраць яго.
«Што рабіць далей? Як выгрызацца? Здавацца Украіне і казаць, што, ой, прабачце, чорт спакусіў?
Ці пайсці здавацца на Захад, расказваць тую ж самую гісторыю пра сябе: зняць санкцыі і сказаць, што я там вызвалю палітычных зняволеных, правяду нейкія выбары, магчыма, нават пайду з пасады прэзідэнта, стану кіраўніком нейкай дзяржрады ўмоўнай, але пакіну свой нейкі ўплыў?» – спрабуе аналізаваць думкі Лукашэнкі Ступак.
Агулам жа, на думку эксперта, дыктатар больш за ўсё баіцца палка Кастуся Каліноўскага, які можа пайсці ў Беларусь і толькі набраць новых прыхільнікаў.
«Куды бегчы? Чыёй дапамогі прасіць?» – разважае вайсковы эксперт.
На ягоную думку, Лукашэнка можа радавацца, што ў Беларусь завезлі расейскую ядравую зброю, «але гэта такая лжывая надзея», «гэта не панацэя».
Якуб Хруст belsat.eu