У нядзелю, 27 лютага, па ўсёй Беларусі на акцыях пратэсту супраць вайны і рэферэндуму затрымалі больш за 800 чалавек. Людзей да гэтага часу ўтрымліваюць у ізалятарах у нечалавечых умовах, паведамляе праваабарончы цэнтр «Вясна».
Па інфармацыі праваабаронцаў, некаторых людзей пасля затрымання збівалі, а на Акрэсціна ім не даюць ежы.
Беларускія суды ўжо разглядзелі больш за 267 адміністрацыйных спраў. Агулам за два дні судовага канвееру арыштавалі мінімум 230 чалавек і прызначылі толькі 14 штрафаў. Суддзі разглядаюць справы за сем хвілін і нават працуюць да 21:00.
Так мастака Дзмітрыя Дарашэнку арыштавалі на 15 содняў.
Сёння, 2 сакавіка ў судзе Маскоўскага раёна асудзілі беларускага мастака Дзмітрыя Дарашэнку (Doctor_oy). Яго абвінавацілі ва «ўдзеле ў масавым мерапрыемстве» (арт 24.23 КаАП) 27 лютага. Суддзя Таццяна Пірожнікава прызнала яго вінаватым і пакарала 15-сутачным арыштам. Адбываць «суткі» Дзмітрый будзе ў ІЧУ Жодзіна, дзе сёння для затрыманых не прынялі перадачы ў сувязі з каранавірусам.
Вынеслі прысуд і віяланчэліста гуртоў Pylai і IRDORATH Елеўферыя Гайко.
Учора, 1 сакавіка ў судзе Кастрычніцкага раёна адбыўся суд над 27-гадовым удзельнікам гуртоў Pylai і IRDORATH Елеўферыем Гайко. Справу разглядала суддзя Вольга Няборская.
Згодна з пратаколам па арт. 24.23 КаАП, Гайко на праспекце Незалежнасці, 35 прыняў удзел у масавым мерапрыемстве і выкрыкваў лозунг «Нет войне». Сваю віну музыка адмаўляе. Сведка-міліцыянт на судзе сцвярджаў, што асабіста бачыў хлопца ў групе пратэстоўцаў. Але Елеўферый звярнуў увагу суддзі на тое, што сведка хлусіць. На гэта суддзя параіла яму звярнуцца ў адпаведны орган. Вынік – 14 содняў арышту.
Тым часам у Менску адбываюцца адзінкавыя акцыі супраць вайны ва Украіне.
МГМ, belsat.eu
