У Наваградку цяжарную жанчыну аштрафавалі за тое, што яна «распаўсюджвала» лагатып групы «Мая краіна Беларусь» у сацыяльнай сетцы «Вконтакте».
У пастанове суда, які адбыўся 21 сакавіка, гаворыцца пра тое, што жанчына падпісалася на групу «Мая краіна Беларусь», якую пазней прызналі «экстрэмісцкай», яшчэ ў 2019 годзе. Але «не абмежавала доступ» да прагляду лагатыпу іншым карыстальнікам, чым спрыяла яго «распаўсюджванню»: «гэта дазволіла бесперашкодна яго праглядаць іншым карыстальнікам згаданай сацыяльнай сеткі».
Жанчына не прыйшла на суд, але сваю віну прызнала. Суд пастанавіў аштрафаваць яе паводле ч. 2 арт. 19 Кодэкса аб адміністрацыйных правапарушэннях («Распаўсюджанне, выраб, захоўванне, перавозка інфармацыйнай прадукцыі, якая ўтрымлівае заклікі да экстрэмісцкай дзейнасці або прапагандуе такую дзейнасць»).
У якасці пакарання жанчыне прызначылі штраф у 25 базавых велічынь, або 1000 рублёў.
У пратаколе адзначаецца, што жанчына знаходзіцца на ўліку па цяжарнасці, а таксама мае яшчэ адно няпоўнагадовае дзіця.
Раман Шавель belsat.eu