Палітычны аналітык Арцём Шрайбман у YouTube-шоў «Часики тикают» распавёў пра сваю сакрэтную перапіску з міністрам замежных справаў Уладзімірам Макеем у жніўні 2020 году.
Шрайбман сцвярджае, што перапісваўся з Макеем у Telegram 14 ці 15 жніўня 2020 году. Аналітык кажа, што першы напісаў міністру.
«Я яму нешта такое пафаснае напісаў на тэму таго, што гэта гістарычны момант, ёсць магчымасць увайсці ў гісторыю альбо так, альбо як ён у выніку і ўвайшоў. І сказаў яму, што я ведаю людзей, якія зараз збіраюць Каардынацыйную раду. Калі ён раптам захоча звязацца, калі ён захоча наладзіць дыялог, то я дапамагу яму знайсці кантакт.
І ён мне напісаў, што плануе сам ісці да Лукашэнкі (ён напісаў «наверх», гэта значыць да таго, хто вышэйшы за яго) і ініцыяваць дыялог. Вось гэтае слова «дыялог» я запомніў», – адзначыў Шрайбман.
Гэта было перад маршам 16 жніўня, зазначае аналітык.
«Я кажу: а калі не? Калі Лукашэнка скажа, што ніякага дыялогу – «мочым». Макей адказаў: «Тады далей без мяне…» Са шматкроп’ем. І на гэтым перапіска наша скончылася», – распавёў Шрайбман.
«Дыялог быў пасланы куды далей, відаць, і Макей застаўся, – канстатуе эксперт, – З гэтага моманту я зразумеў, што ў слова гэтага чалавека ёсць зразумелая цана».
Нагадаем, міністр замежных справаў Уладзімір Макей падчас палітычнага крызісу 2020 году падтрымаў Аляксандра Лукашэнку. Ён публічна апраўдваў палітыку масавых рэпрэсіяў унутры краіны і абвастрэння стасункаў з Захадам. Макей памёр 26 лістапада 2022 года. Паводле інфармацыі «Нашай Нівы», прычынай смерці магло стаць самагубства.
Глеб Нержын belsat.eu