Больш за палову атрымальнікаў сямейнага капіталу ў Беларусі хочуць хутчэй яго выдаткаваць
У Беларусі адкрыта 136 тысяч рахункаў «Сямейны капітал» для шматдзетных сем’яў. З іх амаль 83,7 тысяч атрымальнікаў хацелі б хутчэй выдаткаваць гэтыя грошы. Пра гэта Мінпрацы і сацабароны расказала агенцтву «Минск-Новости».
Усяго пададзена 83 685 заяў на датэрміновае выкарыстанне сямейнага капіталу. 67 998 семʼяў хочуць выдаткаваць грошы на паляпшэнне жыллёвых умоў. Яшчэ 9 269 – на атрыманне медпаслуг, 6 413 – на атрыманне адукацыі, 5 – на набыццё тавараў для інвалідаў.
Па заявах прынята 81 185 рашэнняў, аднак Мінпрацы і сацабароны не ўдакладняе, якія гэта рашэнні.
«Сямейны капітал» – дзяржпадтрымка для шматдзетных семʼяў. Пры нараджэнні або ўсынаўленні трэцяга і наступных дзяцей дапамога ў 2024 годзе складае 31 480 рублёў. Выдаткаваць гэтыя сродкі можна па дасягненні 18-годдзя дзіцяці. Аднак ёсць выпадкі, пры якіх можна скарыстацца грашыма датэрмінова. Гэта траты на паляпшэнне жыллёвых умоў, навучанне ў дзяржаўных ВНУ і на аплату медычных паслуг.
Арсен Рудэнка belsat.eu
