«Dissidentby»: з Беларусі экстрадавалі палітвязня, які пагадзіўся ваяваць на баку Расеі
Ініцыятыва «Dissidentby» паведамляе, што палітзняволены расейскі грамадзянін Антон Лысаў быў вызвалены з калоніі ўвосень 2023 і экстрадаваны ў Расею з прычыны згоды на ўдзел ваяваць супраць Украіны.
Ініцыятыва атрымала пацверджанне гэтай інфармацыі адразу з некалькіх крыніцаў.
«Такім чынам мы можам убачыць, як моцна павялічылася прысутнасць Расеі на ўсіх узроўнях дзяржаўнага кіравання Лукашэнкі», – рэзюмуе «Dissidentby».
Жыхар Чабаксараў, грамадзянін РФ Антон Лысаў быў затрыманы ў Менску ў 2021 годзе: яго і беларуса Захара Таразевіча абвінавацілі ў падпале аўтамабіля старшыні Дзяржаўнага камітэта судовых экспертыз Беларусі Аляксея Волкава. Працэс праходзіў у закрытым рэжыме. Лысава асудзілі да 10 гадоў зняволення, Таразевіча – да 7,5 гадоў. Абодва былі прызнаныя палітвязнямі.
У траўні 2023 года выданне «Наша Ніва» паведамляла, што Лысоў, адбываючы пакаранне ў віцебскай калоніі, пісаў Яўгенію Прыгожыну з просьбай узяць яго ў «ПВК Вагнэра». Адзін з сукамернікаў распавёў журналістам, што ў Лысава была мара запісацца ў «ПВК Вагнэра» яшчэ да поўнамаштабнай вайны з Украінай.
Глеб Нержын belsat.eu
