Паводле звестак «BYPOL», падчас вучэнняў на Абуз-Лясноўскім палігоне загінуў вайсковец – імаверна, учыніў самагубства. Кіраўнік арганізацыі былых сілавікоў расказаў «Белсату», чаму такія навіны становяцца ўсё часцейшымі.
Кіраўнік арганізацыі былых беларускіх сілавікоў «BYPOL» Аляксандр Азараў расказаў «Белсату», што інфармацыю пра смерць падчас вучэнняў на Абуз-Лясноўскім палігоне правяралі некалькі дзён, пацверджанні знайшлі, хоць у вайсковай частцы старанна ўтойваюць інфармацыю аб здарэнні.
«Правяраюцца дзве версіі, – расказаў Азараў. – Першая версія – неасцярожнае абыходжанне са зброяй. А другая – самагубства. Версія забойства не разглядаецца. Усе схіляюцца да версіі менавіта самагубства».
Паводле Азарава, цяпер утаіць такую інфармацыю немагчыма, раней ці пазней грамадскасць даведаецца пра смерць у войску. Раней такія навіны з’яўлялася рэдка, бо і выпадкаў смерці ў войску было няшмат. Пасля 2020 года ці не кожны месяц здараецца самагубства вайскоўцаў ці сілавікоў, адзначыў Азараў.
А гэта паказвае, што ў беларускім грамадстве цяпер пануе дэпрэсія, канстатуе Азараў. Гэтая дэпрэсія выкліканая тым, што ў 2020 годзе беларускі народ спадзяваўся на змену рэжыму Аляксандра Лукашэнкі, але пратэсты былі задушаныя, трываюць масавыя рэпрэсіі і штодзённыя пасадкі ў турмы.
Для вайскоўцаў могуць мець значэнне і частыя вучэнні: Азараў кажа, што вайскоўцы не думаюць пра свае перакананні і жыццёвыя пазіцыі, вайну ва Украіне, а проста выконваюць загады, але нікому не падабаецца жыццё на палігоне – у намёце ў лесе без сувязі з родзічамі і сябрамі. І, вядома, Беларусь саўдзельнічае ў вайне ва Украіне – вайскоўцы разумеюць, што раней ці пазней можа быць створаная анансаваная супольная групоўка войскаў, могуць паслаць на вайну і яны вернуцца дамоў «у мяшку», а гэта таксама ўплывае на маральны клімат.
У 2023 годзе вядома пра мінімум чатыры выпадкі самагубства ў беларускім войску, прынамсі адзін выпадак быў ужо ў 2024-м. Часцейшымі зрабіліся і выпадкі загадкавай смерці сілавікоў – магчыма, некаторыя з іх былі самагубствам. Самагубства можа ўчыніць і просты рабочы, і зорка вялікага спорту.
Ці не ў кожнай краіне прапаноўваюць бясплатную псіхалагічную дапамогу. У Беларусі яе можна атрымаць праз нумары + 375 17 2722167 (РНПЦ псіхічнага здароўя) і 8 801-100-1611 (Дзіцячая тэлефонная лінія), а таксама праз абласныя нумары. Акрамя таго, па псіхалагічную дапамогу можна звярнуцца ў онлайн-праект «еЗдароўе».
Юлія Цяльпук, Алесь Наваборскі belsat.eu