«Белсат» працягвае распавядаць пра выпадкі рэпрэсіяў, якія чыніць рэжым Аляксандра Лукашэнкі супраць беларускага грамадства.
Праваабарончы цэнтр «Вясна» паведамляе, што адміністрацыя наваполацкай калоніі працягвае ціснуць на палітвязняў: некаторых на доўгі тэрмін змяшчаюць у ШІЗА і ПКТ, пазбаўляюць спатканняў, перадач і званкоў, а таксама блакуюць ліставанне.
Акрамя гэтага, у калоніі вельмі холадна, у тым ліку праз тое, што адміністрацыя стварае пэўныя ўмовы, каб у памяшканнях былі скразнякі. У штрафных ізалятарах вязняў таксама катуюць холадам. Ім забароненыя цёплыя рэчы, фізічныя практыкаванні выконваць нельга. Праз гэта ў людзей пачынаюцца праблемы са здароўем. У такіх умовах іх могуць утрымліваць па некалькі месяцаў запар.
Сілавікі затрымалі беларуса за сімпатыі да палку Каліноўскага. Хлопец стаў ахвярай правакатара Юрыя Комара, які ў чат-рулетцы выдаваў сябе за ўкраінца, і цікавіўся ў выпадковага суразмоўцы, як хлопец ставіцца да беларускіх добраахвотнікаў ва Украіне. «Як да сваіх!»– адказаў той. Па якім артыкуле затрыманы хлопец і дзе цяпер знаходзіцца, невядома.
7 траўня ў судзе Менгарсудзе пачнуць разглядаць справу 39-гадовай Наталлі Крук. Ёй інкрымінаваныя ч. 1 арт. 342 КК («Удзел у дзеяннях, якія парушаюць грамадскі парадак або заклікі да такіх дзеянняў») і ч. 3 арт. 361 КК («Заклікі да санкцыяў»). Пра затрыманне Наталлі стала вядома летась у жніўні: тады прапагандыст Грыгорый Азаронак прыйшоў да яе ў ГУБАЗіК браць «пакаяльнае інтэрв’ю», аднак жанчына дэманстратыўна адмовілася з ім размаўляць. Паводле «Нашай Нівы», незадоўга да затрымання Наталля вярнулася з Польшчы.
Улады зноў папоўнілі Спіса экстрэмісцкіх матэрыялаў: туды трапілі Instagram-акаўнты «narodny_reporter» і «da_voli», а таксама старонка ва «Вконтакте» «МОВА ТУТ».
Глеб Нержын belsat.eu
