«Беларуськалій», «Белгазпрамбанк», БЧ. Пад санкцыі Украіны трапілі 23 беларускія кампаніі

Прэзідэнт Украіны Уладзімір Зяленскі ўхваліў санкцыі супраць 23 беларускіх прадпрыемстваў. Сярод іх – «Беларуськалій», «Белгазпрамбанк», Беларуская чыгунка, Гомельскі хімічны завод, «Лакафарба». Адпаведны ўказ апублікавалі на сайце кіраўніка Украіны.

Здымак мае ілюстрацыйны характар.

Фота: rw.by

У вечаровым відэазвароце 28 студзеня Уладзімір Зяленскі паведаміў пра ўвядзенне санкцыяў супраць юрыдычных асобаў, якіх «дзяржава-агрэсар выкарыстоўвае для транспартавання чыгункаю вайсковай тэхнікі і жаўнераў». Як сказаў украінскі лідар, ён спадзяецца, што такія ж захады прымуць і іншыя краіны.

Усяго ў пераліку 182 прадпрыемствы, у тым ліку 23 беларускія. Іх актывы ва Украіне блакуюцца, маёмасць пойдзе на патрэбы абароны. Таксама забараняюцца любыя гандлёвыя аперацыі з імі, ім не дазваляецца транзіт. Украіна спыняе выкананне фінансавых абавязанняў. Санкцыі будуць дзеяць 10 гадоў.

Пад абмежаванні трапілі:

• «Беларуськалій»;
• лізінгавая кампанія «Беларусбанку» «АСБ Лізінг»;
• Гомельскі хімічны завод;
• Беларуская чыгунка;
• транспартна-экспедыцыйнае прадпрыемства Беларускай чыгункі «Белінтэртранс – транспартна-лагістычны цэнтр»;
• экспартна-вытворчае рэспубліканскае ўнітарнае прадпрыемства «Беллесэкспарт»;
• замежнае ТАА «Кранаспан» з Магілёўскага раёну;
• беларуска-расейскі «Белгазпрамбанк»;
• лідская «Лакафарба»;
• наваполацкае прадпрыемства для транспартавання сыравіны «СГ-Транс»;
• смаргонскае ТАА «Садружнасць Транс-Агра»;
• аршанскае ТАА «Грузавая служба-Захад»;
• менскае ААТ «Прамагралізінг»;
• менскае ТАА «ЗапТрансЛагістык»;
• менскае ТАА «Транзіт-Аўта 2003»;
• берасцейскае ТАА «АлдзіГрад»;
• менскае ТАА «ЕўраТрансВагон»;
• ТАА «Ізатэрмічная Лагістыка» з Менскага раёну;
• менскае ТАА «ПЛМ-Iнавацыi»;
• менскае ТАА «Рыетуму Лізінг»;
• менскае ТАА «Рэал-агент»;
• аршанскае ТАА «Сыравiнныя Рэсурсы-Бел»;
• замежнае ТАА «Омск Карбон Магілёў» з Магілёўскага раёну.

Сяргей Крот belsat.eu