Беларусь і В’етнам будуць штогод на парытэтнай аснове накіроўваць па 15 грамадзянаў на поўны курс навучання паводле праграмы бакалаўрыяту, магістратуры і дактарантуры.
Адпаведная пастанова прадугледжаная міжурадавым пагадненнем аб супрацы ў сферы адукацыі, што было апублікаванае на Нацыянальным прававым інтэрнэт-партале.
Маецца на ўвазе бесперапынная адукацыйная праграма навучання ў дзённай форме тэрмінам 5–6 гадоў.
«Навучэнцы бесперапыннай адукацыйнай праграмы вышэйшай адукацыі абавязаныя прайсці поўны курс навучання», – гаворыцца ў дакуменце.
Акрамя таго, для «ўдасканалення педагагічнай дзейнасці бакі штогод накіроўваюць» адно да аднаго на стажыяванне да 5 прадстаўнікоў прафесарска-выкладчыцкага складу ўстановаў вышэйшай адукацыі.
У пагадненні гаворыцца пра намер Беларусі і В’етнаму абменьвацца досведам «у найважнейшых кірунках развіцця сістэмы адукацыі», а таксама праводзіць супольныя навуковыя даследаванні ў прыродазнаўчых, тэхнічных, гуманітарных і педагагічных навуках, якія выклікаюць узаемную цікавасць.
Нагадаем, раней у снежні ўрады Беларусі і Вʼетнаму падпісалі пагадненне наконт узаемнага скасавання візавага рэжыму.
Глеб Нержын belsat.eu