Працаўнікі ДАІ ў Менску зладзілі выязны адкрыты разгляд адміністратыўнай справы супраць вайскоўца, які пʼяны кіраваў аўтамабілем.
Намеснік начальніка аддзелу ДАІ Савецкага раёну сталіцы Яўген Крыварот публічна разгледзеў адміністратыўную справу ў дачыненні вайскоўца, які пʼяны кіраваў аўтамабілем. Працаўнікі ДАІ спынілі аўта вайскоўца 120-й асобнай гвардзейскай механізаванай брыгады 10 снежня. На момант затрымання ў яго выявілі 2,1 праміле алкаголю.
Справу разглядалі публічна. Дзеля таго, каб пакараць вайскоўца, сабралі вайскоўцаў з брыгады і агучылі прысуд: штраф 200 базавых велічыняў (6400 рублёў) і пазбаўленне права займацца дзейнасцю, звязанай з кіраваннем транспартнымі сродкамі, тэрмінам на 5 гадоў.
Пасля разгляду гэтай справы падпалкоўнік міліцыі агучыў перад вайскоўцамі статыстыку дарожных аварыяў і прадэманстраваў тэматычны фільм.
Алена Аляксандрава belsat.eu
