Грамадскага актывіста Змітра Дашкевіча і яго цяжарную жонку Насту выклікалі на допыты па справе аб пратэстах 2020 года. Пра гэта актывіст паведаміў на старонцы ў Facebook.
Нягледзячы на магчымы крымінальны пераслед яны застаюцца ў Беларусі. Сям’я гадуе трох дзяцей.
Зміцер разважае, што мусіў бы з’ехаць з краіны, але застаецца ў Беларусі: «Я разумею, каб жыць спакойна – трэба ехаць. Каб стаць героем – трэба ехаць і абвінавачваць тых, хто застаўся. А так, што я тут: сяджу пад акупацыяй, рэжым не валю і танкі не спыняю – агент і здраднік – дый толькі. Але для мяне заставацца ў Беларусі – найцяжэйшае штодзённае рашэнне. І нават не таму, што зона – там нічога новага, а таму, што ты не належыш сам сабе».
«Я не ведаю, ці я вярнуся сёння. Калі я вярнуся сёння, я не ведаю, ці я вярнуся наступны раз. […] На зоне – нічога новага і гэта не канец свету. Таму за мяне не хвалюйцеся», – напісаў Зміцер Дашкевіч.
Зміцера выклікалі на допыт разам з цяжарнай жонкай Настай: «Нас выклікалі на допыт удвух, а пойдзем мы ўтрох – і гэта, напэўна, найцяжэйшае выпрабаванне ў маім жыцці», – піша былы лідар «Маладога фронту».
Зміцер Дашкевіч – адзін з нямногіх актывістаў і былы лідар палітычнай апазіцыйнай партыі, які дагэтуль знаходзіўся на волі. Цяпер ён займаецца прадпрымальніцкай дзейнасцю – вытворчасцю мэблі «Цесляры». У 2020-2021 гадах яго затрымлівалі на содні за абарону Курапатаў і удзел у акцыі.
АД belsat.eu
