У кожным раёне Беларусі і горадзе абласнога падпарадкавання да 1 студзеня 2025 года мусіць быць створаны прынамсі адзін прыязны да дзяцей пакой для допытаў, гаворыцца ў адпаведнай пастанове Савету Міністраў РБ. Дакумент быў апублікаваны на Нацыянальным прававым інтэрнэт-партале 19 жніўня.
У пастанове «Аб змяненні кодэксаў у пытаннях крымінальнай адказнасці» вызначаюцца крытэры прыязнага да дзяцей пакою для допытаў. Паводле дакументу, гэта адмыслова абсталяванае памяшканне, у якім органам, што вядзе крымінальны працэс, здзяйсняецца допыт непаўналетніх пацярпелых ці сведкаў, якія не дасягнулі 16-гадовага ўзросту, у крымінальных справах аб злачынствах супраць асабістай свабоды, гонару і годнасці, жыцця і здароўя, палавой недатыкальнасці ці палавой свабоды.
Пакоі будуць стварацца на базе сацыяльна-педагагічных цэнтраў на падставе распараджэння старшыні адпаведнага мясцовага выканаўчага і распарадчага органу абласнога ці базавага тэрытарыяльных узроўняў. Таксама такі пакой можа быць створаны ў памяшканнях Дзяржкамітэту судовых экспертызаў і Следчага камітэту.
У прыязным да дзяцей пакоі для допытаў мусяць быць:
- асобныя ўваходы і выхады, месца для верхняга адзення;
- сумежнае ізаляванае памяшканне, абсталяванае гука- і відэазапісавай апаратурай, сродкамі радыёкамунікацыі, прызначанае для дыстанцыйнага назірання;
- гуканепранікальнасць;
- сцены мусяць быць пафарбаваныя ў пастэльныя колеры, не можа быць карцінаў і іншых элементаў дэкору;
- канапа, фатэль, стол, фатэль-мяшок, падушка для канапы, цацкі;
- сістэма гука- і відэафіксацыі;
- не менш за 2 відэакамеры;
- адзін камп’ютар, два маніторы.
Адкрыццё прыязных да дзяцей пакояў для допытаў будзе фінансавацца са сродкаў з мясцовых бюджэтаў, прадугледжаных на функцыянаванне сацыяльна-педагагічных цэнтраў.
Марыя Міхалевіч belsat.eu
