«Не старгаваліся». Ва Украіне заявілі, што беларусы ў пяць разоў завысілі цэны на дэталі для «Градаў»
Галоўнае ўпраўленне выведкі Мінабароны Украіны раскрыла падрабязнасці перамоваў пра пастаўкі камплектуючых для вытворчасці і рамонту ракетных сістэмаў залпавага агню «Град». Ведамства сцвярджае, што беларускі бок прапанаваў кошты, у 5–6 разоў вышэйшыя, чымся чакалі расейцы.
Перамовы вялі беларуская кампанія «Волатаўта» і расейскае «Специальное конструкторское бюро». Кантракт датычыў 250 адзінак прадукцыі, неабходнай для вырабу і рамонту ракетных сістэмаў «Град».
«Спрэчка ўзнікла падчас сустрэчы, калі дэлегацыя «Волатаўта» прэзентавала паперы з разлікамі. Кошт асобных відаў беларускай прадукцыі перавышаў чаканы расейцамі на 500–600%», – сцвярджае Галоўнае ўпраўленне выведкі Мінабароны Украіны.
У выніку беларускі бок прапанаваў аддаць замову субпадрадчыкам, якія не маюць адпаведных ліцэнзіяў:
«Гэта азначае зніжэнне якасці прадукцыі, а таксама падвышаныя рызыкі выкарыстання зробленых з такіх дэталяў і вузлоў РСЗВ “Град”».
Абодва гэтыя прадпрыемствы залучаныя ў заходнія санкцыйныя спісы.
Раней у Беларусі хваліліся, што дапамагаюць Расеі ў вытворчасці зброі і маюць з гэтага прыбытак. «Белсат» пісаў, што некаторыя беларускія прадпрыемствы ваенна-прамысловага комплексу сталі больш актыўна шукаць новых супрацоўнікаў.
Сцяпан Кубік belsat.eu
