Рэдакцыя Reform.by атрымала ліст ад Аператыўна-аналітычнага цэнтру пры прэзідэнце пра тое, што ААЦ пастанавіў ануляваць запіс аб рэгістрацыі даменнага імя reform.by. Ліст падпісаны 15 красавіка 2024 года.
«У сувязі з залучэннем у рэспубліканскі спіс экстрэмісцкіх матэрыялаў інфармацыйнай прадукцыі – інтэрнэт-сайту, у якасці ідэнтыфікатара якога ўказанае даменнае імя reform.by, адміністратарам нацыянальнай даменнай зоны прынятая пастанова ануляваць у цэнтралізаванай базе даных пра даменныя імёны, зарэгістраваныя ў нацыянальнай даменнай зоне, у тым ліку пра іх уладальнікаў, запіс аб рэгістрацыі даменнага імя reform.by», – паведамляецца ў лісце за подпісам намесніка кіраўніка ААЦ Сяргея Жарнасека.
Пастанову аб ануляванні абавязаны выканаць рэгістратар hoster.by.
Нагадаем, некалькі дзён таму ААЦ змяніў інструкцыю аб рэгістрацыі даменных імёнаў і цяпер «паводле закону» можа ануляваць рэгістрацыю даменаў, залучаных у спіс «экстрэмісцкіх матэрыялаў».
Пасля анулявання дамену рэдакцыя размесціць сайт на дамене reform.news. Ён таксама ўжо заблакаваны ў Беларусі, але не падкантрольны ўладам у Менску.
Ася Саковіч belsat.eu
