У Новай Баравой у Менску тыдзень была кепская вада, але пра гэта нікому не казалі
У менскім жылым раёне Новая Баравая ўзніклі праблемы з водаправоднай вадой. Пра гэта 16 красавіка паведамілі ў кампаніі-забудоўшчыку «А-100». Праўда, адбылося гэта праз тыдзень пасля таго, як вада сапсавалася.
«Мы ведаем аб праблеме паступлення вады з прымешкай у раёне Новая Баравая. На працягу тыдня мы вядзем камунікацыю з Менскводаканалам, пакідаем ім звароты і афіцыйныя запыты ад таварыстваў уласнікаў, спрабуем высветліць прычыны і паскорыць працэс нармалізацыі вады», – паведамілі ў «А-100».
І параілі не ўжываць ваду з-пад крану.
На гэта кампанія атрымала шмат крытыкі ад жыхароў Новай Баравой праз тое, што тыдзень не паведамляла пра кепскі стан вады.
Затым у «А-100» заявілі, што Менскводаканал прамыў вонкавы трубаправод у Новай Баравой. Таксама ў мікрараён прыбыў вадавоз з чыстай пітной вадой.
У кампаніі таксама параілі праліць ваду, калі яна будзе ісці надалей з прымешкамі. Калі гэта не дапаможа – звяртацца ў дыспетчарскую Менскводаканалу.
Якуб Хруст belsat.eu
