Генштаб Украіны: У вайне могуць узяць удзел да 15 тысячаў беларускіх сілавікоў. Але вайскоўцы ваяваць не хочуць
Беларускія сілавікі могуць узяць удзел у вайне Расеі з Украінай, напаўшы з тэрыторыі Беларусі. Пра гэта на брыфінгу 24 лістапада заявіў намеснік начальніка Галоўнага аператыўнага ўпраўлення Генеральнага штабу Збройных сілаў Украіны, брыгадны генерал Аляксей Громаў.
Паводле Громава, цяпер на тэрыторыі Беларусі застаюцца больш як 9 тысячаў расейскіх вайскоўцаў і 250 адзінак вайсковай тэхнікі. У той жа час Генштаб ацэньвае наступальны патэнцыял у гэтым напрамку як нізкі.
Тым не менш, сказаў Громаў, фармавання ўдарных груповак у Беларусі не адзначаецца. А здольнасць беларускіх Узброеных сілаў весці самастойныя наступальныя дзеянні ва Украіне ацэньваецца як нізкая.
«Маральна-псіхалагічны стан лічыцца нізкім праз адмову большасцю асабовага складу браць удзел у «спецыяльнай аперацыі», а таксама ў вайне з Украінай. У той жа час каля 10–15 тысячаў асабовага складу сілавых структураў Рэспублікі Беларусь гатовыя ўзяць удзел у «спецыяльнай ваеннай аперацыі» Расейскай Федэрацыі. Перадусім, з прычыны прывабнасці высокага грашовага забеспячэння», – зазначыў генерал.
Ён таксама адзначыў, што захоўваецца пагроза ракетных удараў і выкарыстання ўдарных беспілотнікаў з тэрыторыі Беларусі па тэрыторыі Украіне. Паводле генерала, сярод беларускіх вайскоўцаў распаўсюджваецца інфармацыя адносна магчымага абвастрэння на мяжы з Украінай у перыяд да 28 лістапада са спробаю нібыта захопу Украінай і NATO памежных раёнаў Беларусі. Гэта, сказаў Громаў, нагадвае сцэнар вучэнняў, якія праходзілі на беларускай тэрыторыі ў верасні.
Генштаб звярнуўся да беларусаў
Тым часам Генштаб ЗСУ звярнуўся да грамадзянаў Беларусі з заклікам не дазваляць уцягваць сябе ў вайну яшчэ больш.
«Кіраўніцтву РФ пляваць на жыцці расейскіх грамадзянаў, тым больш на жыцці беларусаў і ўкраінцаў. Іх метады не новыя. Тэрор, запалохванне, аперацыі пад чужым сцягам. Усё гэта выкарыстоўваецца з адной мэтай – любымі шляхамі ўцягнуць Беларусь у вайну з Украінай, крывёй і нянавісцю падзяліць нашы народы. Але ці патрэбная расейская захопніцкая вайна самой Беларусі? Адказ відавочны – не патрэбна!»
Таксама ў відэазвароце ўкраінскія вайскоўцы зноў заявілі пра верагоднасць арганізацыі Расеяй тэракту на Беларускай АЭС.
У Генштабе адзначылі, што не лічаць ворагам ані Беларусь, ані беларускі народ і не плануюць праводзіць на тэрыторыі краіны «ніякіх агрэсіўных дзеянняў».
Тым часам стала вядома, што ў Беларусі разгорнутая праца расейскага медычнага атраду спецыяльнага прызначэння. У шпіталі працуюць 124 медыкі: тэрапеўты, УГД-спецыялісты, афтальмолагі, артапеды, неўрапатолагі і рэнтгенолагі. У ім ёсць прыёмнае аддзяленне, тэрапеўтычнае, хірургічнае, рэанімацыя, аптэка.
Як паведамляецца, медычны атрад спецыяльнага прызначэння можа працаваць у любых умовах: як мірнага, так і ваеннага часу. Прыём тут вядуць дзень і ноч. Прапускная здольнасць шпіталю – да 300 асобаў за содні.
Якуб Хруст belsat.eu
