Цяпер беларусам нельга нават захоўваць у сябе дроны. «BELPOL» раіў іх схаваць ці зламаць
28 сакавіка ў Беларусі набыла моц забарона на захоўванне фізічнымі асобамі цывільных беспілотных лятальных апаратаў. Яе ўвялі ўказам № 297 ад 25 верасня 2023 года.
Адразу пасля апублікавання ўказу фізічным асобам у Беларусі было забаронена завозіць, эксплуатаваць і вырабляць дроны. Але яшчэ давалася паўгода на тое, каб пазбыцца беспілотнікаў, перадаўшы або прадаўшы іх арганізацыям ці ІП або здаўшы на захоўванне ў РУП «Белаэранавігацыя».
Цяпер жа завоз, захоўванне, абарот, эксплуатацыя і выраб цывільных беспілотнікаў дазволеныя толькі арганізацыям і ІП у мэтах іх прадпрымальніцкай і прафесійнай дзейнасці з захаваннем патрабаванняў, вызначаных указам.
Пасля ўведзенай забароны рукі да чужой маёмасці пачалі цягнуць праўладныя арганізацыі. Напрыклад, з боку сілавікоў з’явілася ініцыятыва «Крылы», якая стала заклікаць грамадзянаў перадаваць свае БПЛА на патрэбы ўзброеных сілаў і іншых вайсковых фармаванняў.
На думку прадстаўніка «BELPOL» Уладзіміра Жыгара, дроны ў ні ў якім разе не варта аддаваць у рукі «бандытаў у пагонах». Бо ў выніку іх будуць выкарыстоўваць для таго, каб загнаць народ Беларусі ў «канцэнтрацыйныя лагеры».
Паводле яго, гэтыя дроны трэба схаваць так, каб да іх «не дабраліся рукі карнікаў». Каб беспілотнікі ляжалі да моманту, калі «яны спатрэбяцца». Калі няма такой магчымасці – іх трэба зламаць.
Якуб Хруст belsat.eu
