Лідар большасці ў Сенаце ЗША, дэмакрат Чак Шумэр заявіў пра дасягненне кансэнсусу адносна дапамогі Украіне і Ізраілю: Кангрэс мае дзеяць хутка, каб адправіць дапамогу абедзвюм краінам, піша «ABC News».
Паводле Чака Шумэра, адпаведны кансэнсус быў дасягнуты падчас нядзельнай тэлефоннай размовы прэзідэнта Джо Байдэна і лідараў Кангрэсу.
Шумэр выказаў спадзеў на прэс-канферэнцыі ў Нью-Ёрку, што на гэтым тыдні ўдасца нешта зрабіць для дапамогі абедзвюм краінам. Ён адзначыў, што найлепшы спосаб скіраваць дапамогу Ізраілю і Украіне – гэта прыняцце Палатаю прадстаўнікоў адобранага Сенатам дадатковага закону аб нацыянальнай бяспецы, які прадугледжвае дапамогу абедзвюм краінам.
Сенат прыняў пакет на суму 95 мільярдаў долараў у лютым, але спікер Палаты прадстаўнікоў Майк Джонсан не вынес яго на галасаванне.
Раней у нядзелю Байдэн правёў размову з лідарам большасці ў Сенаце Шумэрам, спікерам Палаты прадстаўнікоў Майкам Джонсанам, лідарам меншасці ў Палаце прадстаўнікоў Гакімам Джэфрызам і лідарам меншасці ў Сенаце Мітчам МакКонэлам.
Лідар большасці ў Палаце прадстаўнікоў Стыў Скаліс заявіў, што на гэтым тыдні Палата прадстаўнікоў зменіць свой графік, каб «разгледзець законы, якія падтрымліваюць нашага саюзніка, Ізраіль, і прыцягваюць да адказнасці Іран і яго тэрарыстычных паслугачоў», але пакуль незразумела, што гэта будуць за законы і наколькі яны могуць адрознівацца ад законапраекту, прынятага Сенатам.
Спікер Палаты прадстаўнікоў ЗША Майк Джонсан заявіў у нядзелю, што палата паспрабуе яшчэ раз прагаласаваць за ваенную дапамогу Ізраілю ў адказ на шырокамаштабны напад Ірану. Але ён не ўдакладніў, ці будзе пакет падтрымання Украіны аб’яднаны з дапамогай Ізраілю і ці будзе прагаласаваны на гэтым тыдні.
Старшыня Камітэту ў справе выведкі Палаты прадстаўнікоў Майк Тэрнэр чакае, што галасаванне ў справе дапамогі Украіне адбудзецца на гэтым тыдні і яе прымуць.
Жорсткія кансерватары перасцераглі Джонсана ад залучэння фінансавання Украіны ў любы пакет дапамогі Ізраілю.
Ася Саковіч belsat.eu