Ужо больш за два гады ў Беларусі штодзень адбываюцца палітычныя затрыманні і суды. «Белсат» вядзе хроніку рэпрэсіяў. Вось што стала вядома за 19 верасня.
Музыка і былы палітвязень Ігар Банцэр выйшаў на волю пасля 45 содняў адміністрацыйнага арышту. Яго тройчы асудзілі за распаўсюд «экстрэмісцкіх матэрыялаў». Як распавялі ягоныя блізкія, цяпер Банцэр «знаходзіцца ў цяжкім маральным і фізічным стане».
Актывістцы «Еўрапейскай Беларусі» і шматдзетнай маці Алене Лазарчык прызначалі тэрмін 8 гадоў калоніі ва ўмовах агульнага рэжыму. Суд зрабілі закрытым, таму падрабязнасці невядомыя. Яе абвінавацілі адразу па чатырох артыкулах Крымінальнага кодэксу. 22 ліпеня КДБ унёс Алену Лазарчык у «спіс тэрарыстаў».
Палітзняволенага Уладзіміра Гундара зноў змясцілі ў карцар, дзе ён знак пратэсту абвесціў галадоўку. Паводле жонкі палітвязня Алены Гундар, увечары 17 верасня 62-гадовага мужчыну змясцілі ў карцар. Ён адмовіўся жыць у адной камеры з падселенымі да яго двума вязнямі «нізкага сацыяльнага статусу» і за гэта адміністрацыя турмы пакарала яго 10 соднямі ў карцары. Гундар абвесціў галадоўку на ўвесь тэрмін спагнання.
У Горадні 70-гадовага пенсіянера з Нясвіжа Васіля Дземідовіча прыгаварылі да 6 гадоў калоніі ва ўмовах узмоцненага рэжыму са штрафам у памеры 50 базавых велічыняў. Яго абвінавацілі ў абразах прадстаўніка ўлады, суддзі, Лукашэнкі і арганізацыі масавых беспарадкаў. Таксама з пенсіянера пастанавілі спагнаць маральную кампенсацыю пацярпелым на суму 32 тысячы беларускіх рублёў.
Палітвязня Сяргея Бабко асудзілі да 2 гадоў калоніі. За каментары ў інтэрнэце 50-гадовага мужчыну абвінавацілі па двух артыкулах КК: за абразу Лукашэнкі і абразу прадстаўніка ўлады.
Справу супраць журналіста і сябра Саюзу палякаў у Беларусі Анджэя Пачобута будуць разглядаць у адным з абласных судоў. Але дакладная дата і месца пакуль невядомыя. Пра гэта палітычны вязень напісаў у лісце да жонкі.
Мазырскага праваабаронцу Уладзіміра Целяпуна зноў асудзілі да арышту. Сёння супраць яго разглядалі адразу тры адміністрацыйныя пратаколы па арт. 19.11 КаАП (Распаўсюд экстрэмісцкіх матэрыялаў) за спасылкі на «экстрэмісцкія» публікацыі, пакінутыя ім у сацыяльных сетках у 2021 годзе.
Сёння ў Горадні пачалі судзіць стаматолага-артапеда санітарнай часткі «Гродна Азот» Аляксандра Дураева. Лекара абвінавачваюць у абразе прадстаўніка ўлады (арт. 369 КК), абразе і паклёпе на Лукашэнку (ч.1 арт. 368 і ч.2 арт. 367 КК), а таксама ў незаконных дзеяннях у дачыненні да агнястрэльнай зброі, баепрыпасаў і выбуховых рэчываў (ч. 2 арт. 295 КК) і незаконных дзеяннях у дачыненні да інфармацыі аб прыватным жыцці і персанальных дадзеных (ч. 3 арт. 203-1 КК).
Алена Рувіна belsat.eu