Інстытут беларускай мовы за мяжой можа афіцыйна паўстаць ужо ўвесну 2024 года. Пра гэта прадстаўніца па нацыянальным адраджэнні Аб’яднанага пераходнага кабінета Аліна Коўшык распавяла падчас адкрытай сустрэчы 27 студзеня ў Вільні, піша «Позірк».
«Я вельмі спадзяюся, што ўвесну мы абвясцім пра яго стварэнне, там ёсць ініцыятыўная група, – паведаміла Аліна Коўшык. – Зараз мы фармуем галоўныя ідэі, мэты, задачы. <…>. Асноўнае, што нам патрэбна, – навуковае развіццё беларускай мовы і агулам беларусістыкі. Другі бок інстытуту – прамоцыя, папулярызацыя беларускай мовы і ўсё, што з гэтым звязана».
Установа будзе займацца даследаваннямі беларускай мовы, у перспектыве там можна будзе сканчаць дактарантуру. У пытанні стварэння інстытуту АПК працуе з мовазнаўцамі.
«Яны гэта ствараюць», – зазначыла Коўшык.
Прадстаўніца Кабінету выказала спадзеў на тое, што інстытут «стане часткай альбо асновай» для беларускага навукова-даследчага ўніверсітэту, які плануе стварыць АПК.
«Такім чынам, мы зараз будуем адну цаглінку, якіх павінна быць болей ва ўніверсітэце. Проста пачынаем з таго, што мы зараз рэальна можам зрабіць», – адзначыла яна.
Раней прадстаўніца АПК па нацыянальным адраджэнні паведамляла, што на першым месцы ў спісе мэтаў на 2024 год – пачатак стварэння беларускага нацыянальнага ўніверсітэту. Акрамя таго, запланаванае ўзмацненне галіны беларускіх навуковых даследаванняў у міжнароднай акадэмічнай прасторы.
Увага будзе надавацца і школьнай адукацыі праз пашырэнне сеткі беларускіх школак, створанай у 2023 годзе.
Будзе працягнутая падтрымка незалежнай беларускай культуры ў рамках правядзення году нацыянальных традыцыяў.
Марыя Міхалевіч belsat.eu
